Kontziliazio politikak txertatzeko lanetan dabilen Ikusi enpresan izan dira Aldundiko ordezkariak

ORAIN GIPUZKOA | 2017-09-06 16:00

Kontziliazio politikak txertatzeko lanetan dabilen Ikusi enpresan izan dira Aldundiko ordezkariak

Etorkizuna Eraikiz egitasmoaren baitan berdintasuna sustatzeko lanetan dabiltzan 20 esperientzia pilotuetako bat bisitatu du gaur Markel Olano diputatu nagusiak, Donostiako Ikusi enpresa. "Urte bukaerarako 2.000 lagun baino gehiagok parte hartuko dute berdintasuna sustatzeko Aldundiak martxan jarritako kontziliazio proiektuetan, eta legealdia agortu bitartean kopuru hori handitzen joatea espero dugu", adierazi du Olanok.

"Ilusio handia" proiektuan

Diputatu nagusiak, Emakumeen eta Gizonen Berdintasunerako Organoaren zuzendari Miren Elgarresta, eta, Sebas Zurutuza, Kudeaketa Estrategiako zuzendariarekin batera, bisitatu du Ikusi gaur, enpresa ezagutu eta babesa adierazteko helburuarekin. Donostiako enpresa hori bere esperientzia pilotua definitzen ari da bertako 294 langileen artean kontziliazio politikak txertatu ahal izateko. Hain zuzen Iñaki Maizek, Ikusi enpresako zuzendari nagusiak, zera adierazi du: "Ilusio handia daukagu proiektu honekin eta gure konpromisoa irmoa da. Argi daukagu aurretik daukagun erronka garrantzitsua dela eta bide honetan Aldundiak adierazitako babesa eskertzen dugu". Bestalde, Elgarrestak balioan jarri du, kontziliazioa eta berdintasunaren bitartez, langileen ongizatearen alde lan egiteko Ikusi enpresaren konpromiso handia: "Talde gisa edota norbanako garapen pertsonalerako ezinbesteko elementuak baitira".

Enpresaren errealitatea gertutik ezagutu ondoren, Olanok azaldu du Aldundia, lurraldeko hainbat enpresa eta eragilerekin batera, lanean ari dela Gipuzkoa izan dadin, Europa mailan, pertsonen arteko desberdintasun gutxiena duen lurraldea: "Horretarako ezinbestekoa da emakumeen eta gizonen arteko kontziliazioa eta berdintasuna sustatzea", erantsi du. Halaber, adierazi du kontziliazio pertsonala eta lan-kontziliazioa funtsezkoak direla sustapen ekonomikoa finkatzeko, kontuan izanik hori dela Aldundiaren helburu estrategikoa. 

Esperimentazio proiektuak abian

Etorkizuna Eraikiz ekimenak esperimentazio proiektu desberdinak ditu, eta guztira 3.500 langilek parte hartzen dute bertan; pertsona horien ardura izango da "soluzio zehatzak, errealak eta eraldatzaileak identifikatzea eta aplikatzea", Gipuzkoak etorkizunean izango dituen erronkei aurre egin ahal izateko. Ezarri diren proiektuen artean, kontziliazio eta berdintasunaren alorrean lan egiten duten 20 enpresak daude. Horrela, GipuzkoaLab-ek, gizartearen ordezkaritza organoak, horietako hamar aukeratu ditu aipatutako eremuan, aurten bertan, lanean has daitezen. Gainerako hamar proiektuak, dagoeneko martxan daudenak, emaitza oso onak lortzen ari dira, eta emaitza horiekin kontrolak egin nahi dira berdintasunaren eta kontziliazioaren alorreko hurrengo politika publikoak ezartzen lagunduko duten neurrien inguruan.