Altuning Pro Gipuzkoa lehiaketaren sari emate ekitaldia

ORAIN GIPUZKOA | 2017-12-28 15:06

Altuning Pro Gipuzkoa lehiaketaren sari emate ekitaldia

Etorkizuna Eraikiz ekimenaren barruan, Altuning Pro Gipuzkoa ekimenaren sariak eman dira, Aldundiko Jalgi aretoan ospatutako ekitaldi batean. I.M. de Altuna fundazioak antolatuta, foru erakundearen eta Kutxa Fundazioaren lankidetzarekin, nazioarteko programa arautuetan parte hartzen duten unibertsitate ikasleei zuzentzen zaie. Haiei aukera ematen zaie beren ekarpenak egin ditzaten Gipuzkoaren etorkizuna hobetzeko, atzerrian bete duten egonaldietan ezagutu dituzten esperientzietan eta ideietan oinarrituta, lurraldearen abiada ekonomikoa berraktibatzeko ikasketa izateko helburuarekin; eta mugarri izan daitezen gizarte ekonomikoki lehiakor eta sozialki justu batean.

Baldintza bakarrak dira Gipuzkoako unibertsitate ikasle izatea eta Erasmusen edo beste nazioarteko truke programa arautu batean parte hartzea. Lehenik, parte-hartzaileei galdetegi bat erantzun dute Gipuzkoa nola hobetzeari buruz. Ondoren, egoki iruditu zaizkien proposamen guztiak aurkeztu eta garatu ahal izan dituzte, betiere lurraldearen etorkizuneko erronkekin zerikusia dutenak. Aurten, Gipuzkoan campusa duten unibertsitate guztietako 46 ikaslek, oso diziplina akademiko desberdinetakoek, hartu dute parte. Ekarpen guztien artean, 16 finalera iritsi dira, eta hautatutako guztien artean, hiru izan dira sarituak. Epaimahaiak lanen "goi maila" nabarmendu du.

 

Saritutakoak hauek dira:

- David Mejía Ares. Donostia, Deustuko Unibertsitatea. EA+Ingeniaritza Informatikoa. 23 urte. Egonaldia Edinburgoko Unibertsitatean.  Ekarpena: "Turismo ongi planifikatu eta guztiontzat iraunkor bat lortzeko erronka handia". 'Visit Scotland'en oinarritua, Gipuzkoarako turismo modeloari buruzko ekimen honek marko kontzeptual bat aurkezten du gako diren jarduera eta faktoreen gainean. Orobat, bisitarientzat eta bertakoentzat, sentsibilizazioko eta ikusgarritasuneko planteamendu barneratzaile bat aurkeztu du, zeinak informazioa, kulturaren kontzientziazioa eta jasangarritasun ekologiko bat uztartzen baititu.

- Ekhi Ajuria Illarramendi. Usurbil, Madrileko Unibertsitate Politeknikoa. Ingeniaritza Aeronautikako eta Espazioaren Ingeniaritzaren gradua.  22 urte. Egonaldia Frantzian, Poitiers-eko ENSMAn (École Nationale Supérieure de Mécanique et d'Aérotechnique). Bere proiektua da "Teknologia Aeroespazialeko Berrikuntza eta Garapen Zentroa", eta helburu du lurraldeko enpresa, unibertsitate eta teknologia zentroak batzea, zeinak gai baitira propultsio espazialaren munduan sortzen diren aukerak modu mailakatuan ustiatzeko. 

- Andrea Onandia Aguirrebeitia. Arrasate, Deustuko Unibertsitatea. EA. 22 urte. Arrasate. Atzerriko egonaldia Richmond University-n (AEB). Ekarpena: "UR Entrepreneurship Club - UREC". Ipar Amerikako unibertsitateen Entrepreneurship Club-aren espiritua Gipuzkoan ezartzea, lurraldeko unibertsitateen ekimen ekintzaileen eta eskualdeko eta tokiko agentzien arteko komunikaziorako espazio informal sortuz, horrela ekintzailetasunaren aldeko jarrerak eta kulturak sortzeko.

Epaimahaiaren arabera, saritu dira, batez ere, originaltasuna, izaera berritzaile, proiektuaren lantze maila eta bideragarritasuna. Irabazle bakoitzak 2.000 euroko sari bat eskuratuko du.

Sarituekin batera, bertan izan dira Markel Olano diputatu nagusia, Imanol Lasa Gobernantzako eta Gizartearekiko Komunikaziorako diputatua, Ainhoa Aizpuru Sustapen Ekonomikoko diputatua, Kepa Bilbao M.I. de Altuna fundazioaren ordezkaria eta Garbiñe Etxezarreta Kutxa Fundazioaren ordezkaria. Markel Olanok azpimarratu du Altuning-en eta Etorkizuna Eraikiz-en arteko lotura; izan ere, bi dinamikek helburu dute  "proiektu pilotuak sustatzea, eragileen arteko esperimentazioan eta lankidetzan oinarrituta, Gipuzkoa modernizatzeko eta lurraldearen etorkizun ekonomiko, sozial, kultural eta politikoari aurre egiteko. Etorkizuna Eraikiz-ek zenbait gako ditu Altuning-en parte hartu dutenen lana identifikatzen direnak: prospektiba, berrikuntza, nazioartekotzea...".

Olanok aurkeztutako proiektuen balioa nabarmendu du, "Gipuzkoako etorkizunerako garrantzi handiko gaiak aintzat hartzen baitituzte: modelo turistikoaren iraunkortasuna, industria aurreratuaren bultzada eta ekintzaileen aldeko laguntza. Guztiek, gainera, eragile desberdinak batzen dituzte helburu horien bila; eta kolaboraziozko gobernantzan oinarritzen dira. Gure konpromisoa da ekarpen horiek eremu hauetan garatzen ditugun politika publikoetara eta Etorkizuna Eraikiz-en ideia laborategira ekartzea.  

Diputatu Nagusiaren hitzetan, "mundua eta gizartea abiada bizian aldatzen ari den garai hauetan, beharrezkoa da etorkizuna elkarrekin idaztea. Kontua ez da egoerak aurreikustea, baizik eta herritar guztiontzako nahi ditugun egoerak sortzea, haiekin elkarlanean. Gipuzkoa aurreratu, justu, orekatu eta iraunkor bat eraikitzeko, beharrezkoak dira ideia eta talentu guztiak. Beharrezko ditugu gazteen indarra, irudimena eta freskotasuna. Haien begirada behar dugu, Gipuzkoaren enbaxadore direlako, gure begi eta belarriak mundu eta gizarte globalizatu batean; gure etorkizuna direlako, alegia".

Esan du, orobat, Gipuzkoak Altunak islatzen duen nazioartekotze modeloaren alde egiten duela. "Modelo boluntario bat, ez erbesteratze behartu bat. Nahi dugu gure gazteek mundua ikustea, ona delako; entzutea eta ikastea, bereziki herrialde aurreratuetan; eta lortzen duten ezagutza Gipuzkoara ekartzea. Nahi dugu itzultzea, beren bizitza eta ibilbide profesionala hemen garatzea, beren talentua Gipuzkoaren eta gizartearen mesederako izan dadin, ahal den neurrian. Kapital horri ezin diogu uko egin". 

Altuning proiektua 2009an sortu zen gazteek mundu osoan barrena aurkitzen dituzten ideiak, jarduerak eta erakundeak bere herrialdearen mesedetan aplikatzeko modua izan dezaten, Manuel Ignacio de Altuna (1722-1762) azkoitiarraren espiritua gordez.