Atzegiko boluntarioek 2017ko Boluntariotza saria jaso dute

ORAIN GIPUZKOA | 2017-12-05 22:00

Atzegiko boluntarioek 2017ko Boluntariotza saria jaso dute

2017ko Gipuzkoako Boluntariotza saria jaso dute Atzegiko boluntarioek Markel Olano diputatu nagusiaren eskutik. Foru jauregian egindako sari-emate ekitaldia oso jendetsua izan da; 180 gonbidatu elkartu dira, 100 hirugarren sektoreko eragileak eta beste 80 Atzegiko kideak eta boluntarioak. Olanok azpimarratu du Gipuzkoako Boluntariotza saria "desberdina" dela, boluntarioek beraiek erabakitzen dutelako nori eman, eta Atzegiko boluntarioek egiten duten lana "solidario, eskuzabal eta ordainezina" dela. Horren harira zera nabarmendu du: "Atzegiko boluntarioak sari honen bidez sustatu nahi ditugun boluntariotza eta elkartegintzako balioen eredu paregabeak dira; izan ere, elkarbizitza sustatu, eta enpatia nahiz gertutasuna erakusten dute".

Atzegiko presidente Josean Idoetak eskertu egin dio Gipuzkoako Foru Aldundiari "halako aitortza" egin izana boluntarioen lanari; eta azpimarratu boluntarioek "lan aparta" egiten dutela desgaitasun intelektuala duten pertsonen gizarte bizitza parte hartzeko, eta alde horretatik espero dutela oraindik boluntario gehiago lortzea. Horrez gain, nabarmendu du "boluntarioen eragina" familien bizi kalitatean:"Izan ere, ikusten dute beraien seme-alabek harreman berriak egiten dituztela, eta aisialdiaz beste edozein pertsonak bezala gozatzen dutela".

Boluntario gehiagoren beharra

Halaber, Verdini dantza taldearen ikuskizuna eta Atzegiko bertsolari baten partaidetza izan duen ekitaldian, Maite Peñak, Gizarte Politikako diputatuak, nabarmendu du AtzegiXperience aurtengo kanpainari esker gonbidapen "dotore eta sortzailea" egiten duela profil desberdineko jendea "animatu dadin" boluntario izatera. Gaineratu du "oso gutxi" falta dela 10.000 atzegizale lortzeko. "Eta horretaz harro egon gaitezke Gipuzkoan", gehitu du Peñak, baita goraipatu ere Atzegiko boluntarioak 300 baino gehiago izatea. "Hala ere, boluntario gehiago behar dituzte, jarduera gehiago egin ahal izateko, zinemara joatea dela, hirian edo herrian paseatu, pintxo bat hartzera joan, zaletasun bat partekatu, edo babes emozionala ematea familiarik ez duten pertsonei".

2017ko Boluntariotza Sariaren epaimahaiak nabarmendu du, batetik, Atzegi 1960az geroztik ari izana adimen desgaitasuna duten pertsonak artatzen, 44 zentrotan, eta era guztietako programak eskaintzen, hala nola egoitza programak, familien arretakoak, tutoretzakoak, aisia, kirol eta denbora librekoak, Txolarte, sentsibilizaziokoak, opor programak, eta abar. Eta bestetik, Atzegik boluntariotza sustatzea adimen desgaitasuna duten gipuzkoarren bizitza hobetzeko.