Bio-zientzien sektorea indartzera dator Viralgen Virtual Core enpresa Donostiara

ORAIN GIPUZKOA | 2017-09-15 18:00

Bio-zientzien sektorea indartzera dator Viralgen Virtual Core enpresa Donostiara

Gaixotasun arraroen eta patologia genetikoen aurka jarduteko birusak moldatuko dituen zentroa kokatuko da Donostian. Viralgen Virtual Core hain zuzen Estatu Batuetako Asklepios konpainiaren enpresa bat da, gene-terapia ikertzen duen munduko hiru konpainia nagusietako bat. Europan jarriko duten lehen ikerketa zentroa izango da Donostiakoa: "Estatu Batuetatik datorren inbertsio bat da eta erabaki du Euskadin egitea. Horregatik, benetan garrantzitsua da Euskadiren etorkizunarentzat", adierazi du Arantxa Tapiak, Eusko Jaurlaritzako Ekonomiaren Garapen eta Azpiegitura sailburuak eta gaineratu du: "Osasun arloan arituko da, ikerketa zientifikoaren esparruan, eta produktu berriak merkaturatzen. Eta hain zuzen osasuna da Euskadik aukeratu duena espezializazio adimentsuen artean; azken urteetan izugarrizko inbertsioak egin dira eta gaur halako azpiegitura bat martxan jartzeko gaitasuna daukagu".

Miramonen elkartu dira gaur, Jaurlaritzako ordezkariekin batera, Markel Olano diputatu nagusia eta Ainhoa Aizpuru Murua, Ekonomia Sustapeneko diputatua. "Viralgen enpresak eta Columbus funtsak Donostian, Miramongo parke teknologikoan, kokatzeko egin duten apustuak berresten du Foru Aldundia bio-zientziaren alde egiten dabilen apustu estrategikoa; eta Gipuzkoa erreferente estrategikoa da lurraldera talentu eta inbertsio berriak ekartzeko", adierazi du Aizpuru Muruak.

Gaixotasun arraroak sendatzera bideratua

Ikerketa genetikoa gaixotasunak sendatzera bideratuta dago, batez ere gaixotasun arraroak. Teknologia bidez zelula bati oker dagoen genea ezabatu eta ondo dagoen genea txertatzen diote; eta ondoren, gorputzean sartzen dituzte zelula horiek birusak erabilita. "Aurrerapauso handiak eman dira gaixotasun horiek antzemateko orduan, baina ez da egon halako aurrerapenik horiei konponbidea topatzerakoan. Gure lanean dago gakoa", esan du Javier Garciak, enpresako ordezkariak, aurkezpen ekitaldian.

Ia 10 milioiko inbertsioa egingo da Donostian martxan jarriko den produkzio zentroan, eta prestakuntza altuko 50 lanpostu sortuko direla iragarri dute gaurko ekitaldian.