Bera Bera klubaren proiektua ezagutzen izan dira Aldundiko ordezkariak

ORAIN GIPUZKOA | 2017-09-13 12:42

Bera Bera klubaren proiektua ezagutzen izan dira Aldundiko ordezkariak

Markel Olano diputatu nagusia, Gipuzkoako Foru Aldundiko Emakumeen eta Gizonen Berdintasunerako Organoko zuzendari Miren Elgarrestarekin eta Kudeaketa Estrategiako
zuzendari Sebas Zurutuzarekin, Donostiako Bera Bera klubean izan da; Etorkizuna Eraikiz ekimenaren barruan berdintasuna sustatzeko abian jarri diren esperientzia
pilotuetan parte hartzen ari diren 20 enpresetako bat da Bera Bera. Lehen eskutik ezagutu dute nola garatzen ari diren proiektu hau kirol klubean, eta Olanok azpimarratu du "kirol elkarteen inplikazioari esker, Etorkizuna Eraikiz proiektu aitzindaria izango dela, emakumezkoen kirola eraldatuko baitu Gipuzkoan, berdintasunaren ikuspegitik".

Aurrekaririk gabeko esperientzia

Bera Bera elkarte donostiarrean garatzen ari diren esperientzia pilotuak "ez du aurrekaririk", gogorarazi du Olanok. Eta nabarmendu nahi izan du zein garrantzitsuak
diren horrelako ekimenak: "Benetako desberdintasun egoerak bizi baititugu ekonomiaren eta kirolaren arloetan, eta kirolean berdintasuna bilatu nahi badugu, gainerako kirol
kluben, elkarteen eta komunikabideen inplikazioa ere beharrezkoa baita", ohartarazi du. Zentzu horretan, zera gaineratu du: "Gure obligazioa da, gure erantzukizuna, erreferentzia egokietan oinarritutako gizarte eredu batetarantz eramango gaituen eraldaketa sustatzea, estereotipo zaharkituak alde batera utziz. Eta erantzukizuna konpartitua da, guztiona. Taldean lan egin behar dugu". Era berean, azpimarratu du Etorkizuna Eraikiz ekimenarekin benetako eraldaketa bultzatzen ari direla.

Bisita amaitzean, diputatu nagusiak zera gogorarazi du: "Aurreko igandean emakumeek estropada historikoa eskaini ziguten Kontxan. Ez dute inoren laguntzarik behar kirolari
bikainak direla defendatzeko, beraiek erakusten baitute, Bera Berako emakumeek igandero erakusten duzuen bezala". Horri dagokionez, gogora ekarri du funtsezkoa dela
erreferentzia positiboak edukitzea eta, horregatik, "eskertzekoa da klubek egiten duten lana, eta emakumezkoen kirola profesionalizatzeko egin duten apustua babestu behar
dugu".

Konpromiso sendoa duen Kluba

Igor Etxeberriak, Bera Bera klubeko gerenteak, aipatu du Klubak konpromiso sendoa duela aukera berdintasunaren eta emakumeen eta gizonen arteko berdintasunaren alde kirol profesionalaren arloan. Helburu horrekin, estrategia bat garatu du, zeinaren helburua baita, batetik, emakumezkoen kirol profesionalaren lan baldintzak hobetzea eta langileen kudeaketa profesionalizatzea, eta, bestetik, kirola espezifikoki sustatzea desgaitasuna duten pertsonentzat.
 
Lehen urrats horien ondorioz, Klubak hainbat ekimen garatu ditu: "Lortu du plantila oso orekatua edukitzea, emakume eta gizon kopuruari dagokienez. %65 emakumeak dira, eta %35 gizonak. Gainera, profesionalak kudeatzeko politika berriari esker, ez dago desberdintasunik emakumeen eta gizonen artean, emakumeen eskubideak defendatzen dira eta batzuen zein besteen kontziliazio erantzukidea ahalbidetzen da", azpimarratu du Etxeberriak.

Bera Bera klubaren proiektu pilotuan garatu diren ekintza lerroen artean, azpimarratzekoa da Klubak jardunbide egokiak dibulgatzean oinarritzen den helburu nagusia, emakume kirolari profesionalen eskubideei erreferentzia eginez, lan baldintzak beste kirol arloetakoen parekoak izatea lortuz, kirolarien errendimenduan, profesionaltasunean, ongi egindako lanean eta helburuen lorpenean oinarrituta, sexuaren araberako bereizketarik egin gabe.

Oraindik lan asko egiteko

Bestalde, Miren Elgarrestak azpimarratu du Berak Beraren iniziatiba: "Emakumezkoen kirol jarduera ikusarazteko zailtasunak kontuan hartuta, Bera Berak, nolabait ere, iniziatiba hartu du, eta hainbat esperientzia jarri ditu abian, emakume kirolarien lan baldintzak eta baldintza profesionalak gizonezkoenekiko parekatuz". Horri dagokionez, salatu du "aldaketak sumatzen badira ere, oraindik arazo handia dugu emakumezkoen kirola komunikatu eta balioan jartzeari dagokionez. Komunikabideetan emakumezkoen kirolari ematen zaion tratamendua kirol elkarteen beren talde femeninoei ematen dieten balioaren eta kirolaren tradizio maskulinizatuaren isla da".

Gizonezkoen kirolari emakumezkoenari baino balio gehiago ematen dioten estereotipo mugatzaile horien guztien aurrean, Elgarrestak azpimarratu du "Bera Bera klubarena
bezalako adibideek eragin dezaketela beste kirol elkarteek ere eredu estereotipatu horiek haustea, eta emakumezkoen kirola klubak ekonomikoki ere garatzeko aukera gisa
ikustea". Zentzu horretan, "Bera Berarena bezalako adibideei esker, kirolaren esparruan ere eredu ireki, askotariko eta aberasgarriagoa sustatu dezakegu; gainera, emakumeak
ahalduntzeko tresna baliotsua izan daiteke", erantsi du Elgarrestak.