'Etorkizuna Eraikiz' ekimenaren Nazioarteko Biltzarra egingo dute urriaren 19an

ORAIN GIPUZKOA | 2017-10-13 18:00

'Etorkizuna Eraikiz' ekimenaren Nazioarteko Biltzarra egingo dute urriaren 19an

TeamDayEtorkizuna Eraikiz ekimenaren Nazioarteko I. Biltzarra, aurkeztu du Foru Aldundiak; datorren ostegunean, urriaren 19an, Tabakaleran egingo da, Gipuzkoaren etorkizuna modu partekatuan eraikitzeko hasitako bidea finkatu eta bultzada berri bat emateko.

Gizarte antolatuaren 200 ordezkarik baino gehiagok parte hartuko dute biltzar horretan eta hiru helburu zehaztu dituzte: dinamika aberastea nazioarte mailan erreferentziazkoak diren kasu berritzaileak aurkeztuta; proiektu pilotuetan parte hartzen ari diren pertsonen ekarpenak eta hobekuntzak jasotzea; eta, aurreikusitako sozializazio estrategiaren barruan, Gipuzkoako gizartea Etorkizuna Eraikiz ekimenaren partaide egiten jarraitzea.

Imanol Lasa foru bozeramaileak zehaztu duenez, Biltzarra "mugarri" bat izango da eta aukera emango du egindako ekintzak "guztion artean" ebaluatzeko, baita "ezagutza berria" eskuratzeko ere Etorkizuna Eraikiz ekimenaren antzeko esperientziak, hau da, lankidetzan eta esperimentazioan oinarritutako gobernantza eredu arrakastatsuak, ezagutzera emango dituzten nazioarteko adituen eskutik. Lurraldeko erakundeetako hainbat ordezkarik eta gizarte nahiz ekonomia arloko eragilek parte hartuko dute: esparru ezberdinetako elkarteak, unibertsitateak, enpresak, garapen agentziak… Izena emateko epea zabalik dago, eta honako loturaren bidez ere izena eman ahal izango da. Bozeramaileak parte hartzera animatu ditu herritarrak "guztion ideiak, talentua eta ilusioa beharrezkoak ditugulako!".

Biltzarraren nondik norakoak

Markel Olano diputatu nagusiak inauguratuko du Biltzarra, eta lehenengo hitzaldia Mickey McManusek emango du, etorkizuna eraikitzeko Sormenaren eta Berrikuntzaren erabileran mundu mailan duen esperientzia partekatuz. MacManus, berrikuntza kolaboratiboan aitzindari, Autodesk enpresaren (mundu mailan berritzaileena den softwarearen garapenean espezializatutako enpresa) ikerlari gonbidatua da eta BCG enpresako (berrikuntzako aholkularitza globala) aholkulari seniorra. Bere izenean 10 patente ditu gauzen Internetaren, automozioaren eta zerbitzuen arloan. Eskainiko duen hitzaldian azalduko du nola sor daitezkeen pentsamendu bide berriak, nola berdiseinatu daitezkeen gure ingurunea eta lantaldeen eta sorkuntza eta berrikuntza prozesuen dinamika, gure etorkizuna eraikitzeko orduan; abiapuntutzat hartuta berrikuntza ez dela berez gertatzen den zerbait, eta beharrezkoa dela horretarako espazioak sortzea.

Bigarren gonbidatua Henrik D. Finsrud, Norvegiako udal eta eskualdeen elkarteko berrikuntzako zuzendaria izango da, eta Norvegiako lankidetza publiko-pribatuaren kasua azalduko du. Finsrudek 20 urtetik gorako esperientzia dauka ikerketa proiektuak, klusterrak eta sareak kudeatzen eta abian jartzen. Partaidetza proiektu ugari koordinatu ditu, nazio nahiz nazioarte mailan, sektore pribatuarekin, gobernuarekin eta herritarrekin lankidetzan. Finsrudek bere esperientziaz hitz egingo du, eta gobernantza irekiko Etorkizuna Eraikiz ereduarekin alderatuko du. Hala, Norvegiako ongizate ereduaren indarguneak, ahuleziak eta erronkak aurkeztuko ditu. 

Hirugarren hitzaldia Pauline Carnetek eskainiko du, Ikerketako eta Etnografiako zuzendaria Policy Lab UK delakoan, gobernu tresna berriak garatu eta esperimentatzeko sorkuntza espazioan. Esperientzia sendoa dauka ikerketa sozial eta politikoan, zuzenbidean eta etnografian, eta ikerketa proiektuak eta landa lanak kudeatu ditu Erresuma Batuan nahiz nazioarte mailan. Nagusiki gizarte gaiak ikertu ditu, hala nola nazioarteko migrazioa, pobrezia, enplegua edo askotariko zereginak. Hitzaldian, Carnetek azalduko du nola garatzen dituzten politika irekiagoak eta herritarrei zuzendutakoak gauzatzeko beharrezkoak diren tresnak.

Azkenik, Xabier Barandiaranek, Diputatu Nagusiaren Kabineteko buruak, Etorkizuna Eraikiz ekimenaren berri emango du, eta mahai inguru bat moderatuko du, non aztertuko diren ekimenaren eragileak, faseak, erronkak, ahuleziak eta indarguneak, betiere esperientzia pilotuetan parte hartzen ari diren eragileen, entitateen eta enpresen eskutik, baita ikerketan, aholkularitzan, internazionalizazioan eta sozializazioan adituak diren eragileen eskutik ere. "Proiektu handi guztiek hausnarketarako egun bat izaten dute, esperientziak partekatzeko, besteengandik ikasteko, elkar ezagutzeko, proiektuen berri izan, aztertu eta aberasteko… Azken batean, aurrera egiten jarraitzeko. Aukera paregabea izango da metodologiak eta lehenengo emaitzak testatzeko", adierazi du Lasak.

Proiektuei gainbegiratua

Kultura, Turismo, Gazteria eta Kiroleko diputatu Denis Itxasok, eta Imanol Lasa Gobernantzako eta Gizartearekiko Komunikazioko diputatuak azalduko dituzte Etorkizuna Eraikiz ekimenaren barruan dagoeneko abian dauden prozesuak eta proiektuak, hainbat esparrutakoak: zibersegurtasuna, kontziliazioa eta erantzunkidetasuna, berrikuntza zahartzaroaren arretan, elektromugikortasuna, langileen parte hartzea, aldaketa klimatikoa, ikus-entzunezkoak eta euskara, gastronomia 4.0… Biltzarrari amaiera emateko, ariketa kolektibo bat egingo da etorkizunaren inguruko proiekzio bat egiteko Gipuzkoaren etorkizuna batera irudikatzen izenburupean, Mickey McManusek koordinatuta.

Kongresuaren bezperan, gainera, foru arduradunek laneko bilerak edukiko dituzte gonbidatutako nazioarteko adituekin, "erakundeen arteko elkarlanerako bideak aztertzeko, eta nazioarteko agendan Aldundia jorratzen ari den gaiak kokatu eta kontrastatzeko".