Laboral Kutxaren Gaztenpresa Fundazioak 6.000 lanpostu baino gehiago sortu ditu 15 urtean
Enplegua sustatzea eta enpresen sorreran laguntzea xede duen gizarte alorreko ekimena da Laboral Kutxaren Gaztenpresa Fundazioa, eta 15 urte betetzear denean 3.700 enpresa eta 6.000 lanpostu baino gehiago sortu ditu.
Fundazioaren helburu nagusia da negozio txikien eta mikroenpresen sorrera, garapena eta iraupena sustatzea. Horretarako, enplegu aukera berriak bilatzen ditu, autoenpleguaren bidez, langabezian edo lanpostua galtzeko arriskuan dauden pertsonentzat. Era berean, ikasleen artean ekintzailetza eta proiektu berritzaileak sustatu nahi dituzten unibertsitate eta lanbide heziketako ikastetxeei ere laguntzen die, laguntza ekonomikoaren eta berariazko jarduketen bidez.
Finantzaketa berezia eta aholkularitza integrala
Gaztenpresak negozioaren fase guztietan laguntzen die ekintzaileei: negozio-ideia zehazten, negozio-plana garatzen eta ondoren, finantzaketan. Horrez gain, finkatzeko fasean ere jarraipena egiten du; izan ere, etorkizuna duten negozioak sortzea da erronka. Fundazioak mentoring programa bat du; horren bidez tutore gisa laguntzeko eta erabakiak hartzea errazteko.
Edonori zabalik
Edonor izan daiteke Gaztenpresaren onuradun: ekintzaileak, laneratzeko eta gizarteratzeko arazoak dituzten kolektiboak, garatzeko proiektuak dituzten mikroenpresa berriak eta erabiltzaileen artean ekintzailetza sustatu nahi duten erakundeak. Ildo horretatik, ez dago adin mugarik zerbitzuetara jotzeko. Gaztenpresaren bidez sortzen diren enpresak gazteak dira, baina Fundaziora jotzen dutenek ez dute zertan gazteak izan.
