2018rako onartuko diren aurrekontuak bereziak direla adierazi du Markel Olano diputatu nagusiak
Gipuzkoako diputatu nagusi Markel Olano izan da Goiena Komunikazio Taldeak ekoizten duen Harira saioko azken gonbidatua. Eneko Azkarate edukien zuzendariak egin dio elkarrizketa eta 2017ari errepasoa egiteko ez ezik, 2018ra begira jartzeko ere baliatu dute aukera. Hain justu datorren urteko aurrekontuak izan dute elkarrizketaren abiapuntua. Dena ondo bidean, abenduaren 22an eztabaidatu eta onartuko dituzte Gipuzkoako Batzar Nagusietan, 850 milioi euroko aurrekontuak: "Bereziak dira, legealdiko azken aurrekontu osoak izango direlako".
Kopuru horren erdia bideratuko dute Gizarte Politiketara, baina kezkatuta azaldu da arlo horri dagokionean. Beldurgarritzat jo duen datu bati egin dio erreferentzia, 2020an 80 urtetik gorako 7.000 pertsona gehiago egongo direla Gipuzkoan. Egoitzetan zabaltzen ari diren plazek ez diote inondik inora erantzuten behar horri, bere esanetan, eta eurek gaur egun Aldunditik egin dezaketen lanetik harago, gizarte osoari egin dio deialdia "bestela ez delako izango iraunkorra".
Kontzertu ekonomikoari eraso egiten dioten alderdiek eredu bakarra nahi dutela oinarrian espainiar estatuko autonomia guztientzat adierazi du, eta zera gaineratu: "Gipuzkoak ondo egiten ditu berari dagozkion lanak".
Proiektu zehatzei buruz galdetuta legealdi hasieran hartutako konpromisoen kudeaketa "oso ondo" doala jakinarazi du, eta "legealdi amaierarako martxan edo froga fasean egongo dira guztiak". Eta zera gaineratu du: "Horiek dira Gipuzkoan ez aurrera ez atzera zeudenak, baina etorkizunari begira jartzeko unea da, eta hortik Etorkizuna Eraikiz egitasmoa. Hausnarketan geratu barik, esperientzia konkretuak martxan jartzeko".
Deskargako errepide tartea eta errauste planta
Bide azpiegiturei dagokienean, Beasain-Durango errepideko Deskargako tartea 2019ko martxorako bukatuta egotea aurreikusten du eta horrekin osatuta geratuko da lurraldeko ahalmen handiko errepide sarea. Hortik aurrera, ekintza edo hobekuntza puntualak baino ez dituzte egingo eta garraio eta azpiegiturei dagokienean "beste lehentasun batzuk ezartzeko unea izango da".
Zubietan egongo den errauste plantaren finantzaketari dagokionez, "ez du Aldundiak inbertsiorik egingo, behin martxan jartzen denean zerbitzua ordaindu baizik". Eta gaineratu du: "Orain gutxira arte zabortegietara eramaten ziren, eta gaur egun, kanpora bidaltzen diren hondakinentzako izango da, birziklatu ezin diren hondakinei irteera emateko azpiegitura".
Autobus zerbitzuan egindako aldaketen gainean esan du, azterketa baten emaitzetatik abiatu direla eta "diru kopuru berdinarekin zerbitzua areagotzeko eta hobetzeko" helburuarekin egin dituztela.
Kargura berriz aurkeztea "erabaki kolektiboa"
Euskal Herriaren erabakitze eskubidearekin lotuta, EAJren barruan ikuspegi ezberdinak daudela onartu du; indar abertzaleak batzeko beharra ikusten du diputatu nagusiak eta "inbidiaz begiratzen" dio Kataluniako prozesuari. EAJK eta ezker abertzaleak elkarren beharra dutela ere adierazi zuen.
Diputatu nagusi kargurako hautagai aurkeztuko ote den berriz galdetuta, ordea, erabaki hori "erabaki kolektiboa" dela izan da haren erantzuna.
