600 haurrek 'DenokZu' kantua abestu eta dantzatu dute indarkeria matxistaren aurka
Hainbat udalerritako ia 600 haurrek parte hartu dute gaur goizean, Aldundiak DenokZu sentsibilizazio kanpainaren barruan antolatu duen ekitaldian. Abestu eta dantzatu egin dute indarkeria matxista salatzeko eta biktimei babesa adierazteko. Festa giroan, ETBko Go!azen telesaileko gazteek, besteak beste, DenokZu kantua interpretatu dute. Foru erakundeak sortu berri duen kantuarekin, lurraldeko gazteen kontzientzia piztu nahi da musikaren eta sare sozialen bidez. Ekimen hau ere Aurre! planaren barruan kokatzen da. Foru plan hori da, hain zuzen, aldundi batek bereziki emakumeen aurkako indarkeriari aurre egiteko diseinatu duen lehena, eta gaur aurkeztu da, Emakumeen Aurkako Indarkeria Desagerrarazteko Nazioarteko Egunaren bezperan.
Aurkezpena Donostiako Gipuzkoa plazan egin da, eta azken hilabeteetan sentsibilizazio kanpainan parte hartu duten ikastetxeak izan dira gonbidatu. Plana Gipuzkoako udalekin, elkarteekin eta eragileekin batera prestatu ondoren, azken hilabeteetan, Berdintasunerako organoa lurraldeko 45 ikastetxetako haurrekin batera aritu da tratu onak eta enpatia lantzen. Guztira, lehen hezkuntzako azken lau mailetako 9 eta 12 urte arteko 2.000 haur inguruk hartu dute parte ikastetxean bertan egin dituzten sentsibilizazio kanpainetan.
Bihar, azaroaren 25ean, ospatuko dugun nazioarteko egunaren harira, Aldundiak gaur aurkeztu nahi izan du hezkidetzaren bidez indarkeriaren prebentzioan sakondu asmo duen kantua, hezkidetza baita, azken buruan, “indarkeria matxistarekin bukatzeko balio estrategikoa, eta berdintasunaren bidean ezinbesteko zaigun osagaia”, adierazi du Miren Elgarresta Emakumeen eta Gizonen Berdintasunerako Organoaren zuzendariak. Foru Aldundiarentzat lehentasunezko helburua da desberdintasunari aurre egitea, esparru guztietan, baita genero berdintasunarenean ere, eta, nabarmendu duenez, horretarako “ezinbestekoak dira prestakuntza, ikerketa, prebentzioa eta sentsibilizazioa”. Xede hori argi izanik, kanpaina honek haurren eta nerabeen heziketan eragiten du, "giltzarri baitira horiek belaunaldi berrientzat desio dugun etorkizuneko gizarte eredua sortzeko”, baieztatu du.
Hain zuzen ere, “gizarte eredu” hori izango dute oinarri Gipuzkoako haur eta gazte gehienek, eta kanpaina haiei zuzentzeko asmoz aukeratu du Aldundiak Go!azen, indarkeriaren aurkako kantua sortzeko. Gaur egun gaztetxoen artean arrakasta duen taldea izanik, "gaitasun handia du hainbat kanalen bidez (telebista, irratia, sare sozialak eta abar) mezuak eta balioak azkar batean helarazteko”. Arrakasta horren erakusgarri dira, esaterako, urriaren 30ean aurkeztu zen Go!azen aplikazioak emandako datuak. Estreinatu zenetik hona, 11.000 lagunek deskargatu dute aplikazioa, eta “DenokZu” bideokliparen making ofa 40.000 aldiz baino gehiago ikusi da azken egunetan.
“DenokZu” kantua Iker Lauroba artista gipuzkoarrak konposatu du Berdintasun organoaren laguntzarekin. Kantu “positiboa” da, berdintasuna kontuan hartzen du haren aldaera guztietan, eta estereotipoez nahiz indarkeria mota desberdinez dihardu. Kantuaren bidez, gainera, babes mezu argi bat helarazi nahi zaie biktima guztiei. Mezu hori zabaldu dute gaurko ekitaldian Iholdi Beristainek (Nahia), Ainhoa Larrañagak (Eli), Oihan Morenek (Jontxu), Sara Nietok (Lore), Miren Arrietak (Ane), Beñat Iturbek (Julen), Harkaitz Mendiolak (Gari) eta Nerea Mazok (Nikole).
Ekitaldian parte hartu duten ikasle guztiek foru erakundearen oparia jaso dute: kanpainaren elementu bisuala izango den eskumuturreko lila bat eta Go!azen taldearen disko bat, besteak beste, gaur aurkeztu berri den “DenokZu” kantua barne duena. Ekitaldia bukatzeko, argazki saioa eskaini dute Go!azen taldeko kantariek, eta jarraitzaileek aukera izan dute beren gustuko pertsonaiekin ateratako argazkia etxera eramateko. Horrez gain, Go!azeneko neska-mutilek telesaileko irudiz osatutako postalak eta diskoak sinatu dizkiete hala nahi izan dutenei.
Aldundiak programatutako hurrengo ekitaldia azaroaren 25ean izango da: bihar eguerdian indarkeria gaitzesteko kontzentrazioa egingo da Gipuzkoako Foru Aldundiaren parean. Bertan izango dira foru erakundeetako, Batzar Nagusietako eta Gipuzkoako udalerrietako ordezkariak, eta elkarretaratzean parte hartzeko gonbita egiten diegu, orobat, emakumeen aurkako indarkeria salatu eta biktimei babesa adierazi nahi dieten guztiei. Ekitaldi sortari amaiera emateko, datorren astean, Emakumeen aurkako indarkeriari erantzun publikoa emateko protokolo instituzionala aurkeztuko du Gipuzkoako Foru Aldundiak.
