Adinekoen egoitza eta eguneko zentroetako tarifak eguneratzeko hiru milioi euro onartu ditu Aldundiak
Adinekoen egoitza eta eguneko zentroetako tarifak eguneratu egin dituzte. Aldundiko Gizarte Politikako Departamentuak sektoreko hainbat erakunderekin ditu sinatutako lankidetza hitzarmenak eta kontratu-programak eta horiei ordaintzen dien tarifa %2,2 haziko da. Horri esker Gipuzkoako egoitza zentroetako eta eguneko zentroetako "zerbitzuak eta lan baldintzak hobetuko" dituzte.
Igoera horri aurre egiteko 3.031.109,56 euroko diru-hornidura onartu du Aldundiaren Kontseiluak. Horietatik, 2.602.034,05 egoitza zentroetara bideratuko dute, eta 429.075,51 eguneko zentroetara. 2017ko urtarrilaren 1etik aurrerako atzera eraginarekin onartuko da, gainera, igoera.
2016-2019 aldirako plangintza
Gizarte Politikako Departamentuak egoitza zentroen eta adinekoentzako eguneko zentroen kudeaketa eta baldintzak hobetzeko 2016-2019 aldirako onartutako plangintza barruan dago hartutako neurria. Imanol Lasa foru bozeramailearen esanetan bide orria betetzen dabil Aldundia plaza kopurua hazita batetik eta tarifak eguneratuta bestetik: "Neurri horiek ezinbestekoak dira Gipuzkoako biztanleon zahartze prozesuari aurre egiteko, egoitza eskaintza nahikoa eta lurraldeka orekatua bermatzeko, eta arretaren kalitatea zein erabiltzaileen eta haien familien gogobetetzea ziurtatzeko".
