Ainhoa Aizpuru: "Gipuzkoako enpresek apustu sendoak egiten dihardute Indian"
Ekonomia Sustapenerako diputatua New Delhin izan da gipuzkoar enpresekin tokiko merkatuaren berri izan eta esperientzia arrakastatsuak partekatzeko asmoarekin.
Nola joan da New Delhiko esperientzia?
Gipuzkoako ordezkaritza bat Indian izan berri gara, helburu batekin: Indian gure lurraldeko enpresentzako merkatu eta lankidetza aukera berriak esploratzea. Enpresa eta erakunde misio hau Gipuzkoako Bazkundearekin lankidetzan antolatu da eta zortzi enpresa gipuzkoarrek parte hartu dute bertan. Batetik, herrialdean lantegiak edo presentzia duten Gipuzkoako enpresak bisitatu ditugu eta bestetik, bilerak eta laneko jardunaldiak izan ditugu, sektore ezberdinetako eragile eta enpresak biltzen dituzten elkarteekin. Lan agenda betea izan dugu eta emaitzak ere interesgarriak izan dira. Espero dugu epe motz-ertainean emaitzak emango dituztela. AMPOk Coimbatore hirian zabaldu duen faktoria berriaren inaugurazioan izan ginen, Orbinoxen planta ezagutu genuen, CAF eta Mondragonek dituzten egoitzetan bilerak izan ditugu… Gipuzkoako enpresek apustu sendoak egiten dihardute Indian, dagoeneko urte luzez. Herrialde honek testuinguru interesgarria bizi du gaur egun, eta gainera, Asiako merkaturako sarrera garrantzitsua da.
Indian interesak dituzten gipuzkoar enpresekin izan zara bilduta. Aukerak aurreikusten dituzue bertan?
Indiak testuinguru berezia bizi du. Batetik, agintariek inbertsio handiak aurreikusten dituzte azpiegituretan, eta hor garraioari eta bestelako azpiegiturei lotutako lana egiten duten enpresentzako aukera berriak sortu daitezke. Bestalde, merkatu izugarria da India bere horretan, eta beraz esportazioetarako ere jomuga garrantzitsua da gure enpresentzat –kontuan izan iaz 79 milioi eurotik gorako esportazioak egin zirela Gipuzkoatik hara–. Gure enpresek urteak daramatzate han lanean eta ongi ezagutzen dituzte merkatuaren dinamikak. Esate baterako, Mondragonek lehen bulegoa 1998an jarri zuten New Delhin. Merkatu hori indartzen ari da eta aukera berriak aurreikusten dituzte bertan.
Indian Gipuzkoako hainbat enpresak dituzten esperientzia, desafioak edota arrakasta ezagutu duzu. Nolakoa izaten ari da enpresa hauen esperientzia?
Interesgarria izan zen entzutea, adibidez, Mondragonen ibilbidea Indian. Delegazio txiki batekin hasi eta dagoeneko hamabi kooperatibak lan egiten dute Indian, alor ezberdinetan. Kooperatiben oinarrian dauden balioak zabalduz gainera. Horiek guztiek bere ibilbidea egin dute Indian eta, kontatzen dutenez, herrialdeak bere berezitasunak eta klabeak ditu, eta oso garrantzitsua da horretara egokitzea merkatu horretan lan egitekotan. Burokrazia gainditzea eta azpiegituren gabeziak aipatzen dituzten bereziki, zailtasunen artean. Baina bestalde ezagutu ditugun delegazio eta enpresa guztiak bat datoz esaterakoan zabalkunde garrantzitsu bat izateko zorian dagoela merkatu hau, bereziki etorkizuneko zenbait sektoretan. Eta testuinguru honetan Gipuzkoako enpresek bizi dituzten zailtasun eta desafioak ezagutu ditugu.
MAIT-ekin lankidetza adostu duzue. Zertan datza?
MAITekin elkarlanerako ildo bat zabaldu dugu, baina hartu-eman bat nabarmentzekotan aipatuko nuke Indian Institute of Technology erakundeko arduradunekin hasi dugun harremana. Indiako akademia eta ikerkuntza alorrean erreferentzia da IIT, teknologiaren alorrean maila oso handia dute, eta talentuaren formaziorako eta ekintzailetasuna bultzatzeko lankidetza adostu dugu haiekin.
Beste herrialde batzuetan ere horrelako esperientziak izatea aurreikusten duzue?
Ekonomia Suspertzeko Plana 2015-2019ren baitan, Foru Aldunditik ekonomiaren eta lanpostu sorreraren aldeko apustu garbia egiten ari gara. Horretarako garbi daukagu gure lurraldeko enpresen lehiakortasuna indartzeko neurriak jarri behar ditugula, enpresen lana babestuz eta lagunduz. Lehiakortasunaren faktore nagusietako bat da, hain justu, nazioartekotzea. Gipuzkoak krisiari modu eraginkorrago batean eutsi badio, hein handi batean izan da gure industriak kanpoko merkatuetan ongi kokatuak daudelako. Eta hori indartzen jarraitu behar dugu, batez ere enpresa txiki eta ertainei lagunduz merkatu globaletara eman beharreko salto horretan. Horretarako programa eta diru-laguntza berriak jarri ditugu martxan. Eta gure presentzia lagungarri izan badaiteke Gipuzkoako enpresentzat lehentasunezko diren merkatuetan, zalantzarik gabe antzeko misioak errepikatu eta gogor lan egingo dugu nazioartekotze estrategia hori bultzatzeko.
