Aldundiak 50 plaza berri hitzartu ditu adinekoentzat
Gipuzkoako Foru Aldundiak erabaki du 50 plaza berri hitzartzea adinekoentzat. Horietatik 34 eguneko zentroetan egongo dira; 16, berriz, egoitzetan. Helburua da Gipuzkoako gizarte baliabideen sare publikoaren eskaintza gizartearen beharretara egokitzea eta lurralde oreka lortzea. Horrela iragarri du Maite Peña Gizarte Politikako diputatuak Donostiako Miramon Sanitas egoitzan egin den bisitan. Zentro horretan bertan, foru erakundeak 2 plaza gehiago hitzartu ditu. Atzo abiatutako 50 plaza hitzartu horiekin, urtero 632.263 euroko foru inbertsioarekin (323.460 euro egoitzetan eta 308.803 euro eguneko zentroetan), "zerbitzu eta prestazioen eskaintzaren kalitatea hobetuko dugu, hartara pertsonen beharrei arreta egokia ematen zaiela bermatzeko. Orobat arreta hori pertsonaren ingurunetik ahalik eta gertuen emango da, 2015-2017 Gipuzkoako Gizarte Zerbitzuetako Maparen barruan", azpimarratu du Peñak, bisitaldian Fernando Carril Sanitas Miramon egoitzako zuzendaria lagun izan duela. Bertan, 150 plaza daude, horietatik 75 Foru Aldundiarekin hitzartuak, gehi beste 15 UPSI motakoak (Unitate Psikogeriatrikoa).
Lurraldeko eguneko zentroetako 34 plaza berriei dagokienez, horrela banatzen dira: 4 Azpeitian (Bista Eder), 6 Legazpin (Eguneko udal zentroa), 2 Oñatin (Eguneko udal zentroa), 6 Usurbilen (Puntapax zentroa), 2 Oiartzunen (Aiton Etxe), 1 Pasaian (Paseo zentroa), 2 Errenterian (Eguneko zentroa), 4 Urnietan (Eguneko zentroa), 1 Donostian (Villa Las Mercedes zentroa), 6 Arrasaten (Aita Menni zentroa). Eta egoitzetako 16 plaza berriei dagokienez, hau da banaketa: 6 Hondarribian (Betharram egoitza), 2 Irunen (Inmaculada egoitza), 5 Donostian (3 Berra egoitzan eta 2 Sanitas Miramon egoitzan), eta 3 Lazkaon (Sanitas Lazkao egoitzan).
Amaitzeko, eta Gipuzkoako herritarren zahartzeari dagokionez, Peñak nabarmendu du Gipuzkoan erronkari “estrategia integral” batekin erantzuten zaiola, eta, legealdia amaitu artean 300 plaza berri sortuta, egoitza plaza bat eskatu dutenen itxaron zerrendak “murriztuko direla”. "Egun –gehitu du–, 50 plaza berri horiekin dagoeneko 215 plaza berri zabaldu dira, alegia, 185 plaza iraunkor eta 30 plaza asteburuko eguneko zentroetan".
