Aldundiak AdinBerri estrategia jarriko du abian 55 urtetik gorakoen bizi kalitatea hobetzeko
AdinBerri estrategia aurten hasiko da lanean. Etorkizuna Eraikiz proiektuko egitasmo estrategikoen artean kokatzen da ekimena, eta gizartearen zahartzeari aurre egin eta
pertsonen bizi kalitatea hobetzeko estrategia integrala planteatzen ditu. "2031 urtean, 55 urte baino gehiago dituzten gipuzkoarren kolektiboa 350.000 pertsonetakoa izango da",
gogoratu du Markel Olano Gipuzkoako diputatu nagusiak. Hori horrela, AdinBerriren birtartez "Gipuzkoak duen potentzial berritzailea maximizatu eta zahartze osasuntsuaren zerbitzura jarri nahi dugu. Honela, gure sistema soziosanitarioa hobetu eta alor honetako industriaren lehiakortasuna ere bultzatu nahi dira". Proiektuaren azpiegitura nagusia
Pasaian kokatuko da eta zahartzea eta mendekotasunaren arloan erreferentzia izango den zentro berritzailea izango da. Hau eraikitzeko lanak datorren urtean hasiko dira, eta 2022an amaitzea aurreikusten dira. Lehenago, aurten bertan, berrikuntza unitatea udara ostean hasiko da lanean.
55 urtetik gorakoak gizartearen %35
Pasaian, Ziriza Etxean, egin da AdinBerriren aurkezpena, proiektuaren eraikinak eraikiko diren eremutik 100 metrora. Olanoarekin batera, ekitaldian parte hartu dute Eusko
Jaurlaritzako Osasun sailburu den Jon Darponek eta Pasaiako alkate den Izaskun Gomezek, alor soziosanitarioan eskumenak dituzten erakundeen ordezkariak, AdinBerri ekimena babestu dutenak. Gainera, zahartze gaietan aditua den Luis Goenagak hitzaldia eskaini du, gaur egun bizi den iraultza demografikoa eta honek dituen ondorioak aztertuz. Olanok, bere hitzaldian, azaldu du gaur egun gipuzkoarren %35k 55 urte edo gehiago dituela, hau da, gizartearen %35. Baina, aurreikuspenen arabera, 2031ean %46,5 izango dira, ia 350.000 pertsonetara iritsiz. "Honen eraginez, adibidez, mendekotasun maila duten pertsona kopurua egungo 29.000 pertsonetatik 39.000 urtetara pasako da 2031rako, honek dituen ondorio guztiekin", adierazi du diputatu nagusiak. Erronkaren garrantzia dela eta, gizartearekin elkarlanean eta gaurtik hasita biharko Gipuzkoa eraikitzea xede duen Etorkizuna Eraikiz proiektuak hasieratik jarri zuen zahartzearen gaia lurraldearen etorkizuneko desafio nagusien artean.
"Honela sortzen da AdinBerri, gero eta gertuago daukagun pisuzko arazo bati erantzuteko erreminta gisa, eta aldi berean ikuspegi ekonomikotik irekitzen den abagunea aprobetxatzeko euskarri bezala", azaldu du foru arduradunak eta gaineratu: "Pertsona dago proiektuaren erdigunean, beraien bizi kalitatea hobetzea baita xede nagusia. Ekimenak sei elementu nagusi ditu: arreta zentroa, berrikuntza unitatea, agenda estrategikoa berrikuntzan, fundazioa, elkarlanean arituko diren eragileen ekosistema eta aldikako diru-laguntza deialdia. Ikuspegi bikoitza du ekimenak, soziala eta ekonomikoa, arreta soziosanitarioan eta sektore biosanitarioaren alde apustu eginez gure pertsona edadetuen bizi kalitatea hobetzeko".
Etorkizuna Eraikiz programak jarraitzen duen elkarlaneko gobernantza ereduari jarraiki, AdinBerrin ere lankidetza funtsezko elementua izango da. Sei eremu nagusitan sailkatu daitezke elkarlan horretan arituko diren eragileak. Administrazio publikoak, unibertsitateak, enpresak, hirugarren sektorea, eragile berritzaileak eta sektore biosanitarioa. Hauen artean daude, besteak beste, Eusko Jaurlaritza, Pasaia, Errenteria, Lezo eta Oiartzungo udalak, Matia Fundazioa, Zorroaga, Kabia, Gureak, Aptes, Siis, Biodonostia, Tecnalia, unibertsitateak… "Zahartzaroaren esparruko entitate, enpresa eta eragile guztiei irekita dagoen estrategia de AdinBerri, erakunde guzti hauekin elkarlanean arituko gara arlo honetako ekosistema osatzeko", azaldu du Olanok. Honela, azpimarratu du zahartzaroarena gure gizartea irauliko duen pisuzko erronka dela: "Horregatik emango diogun erantzunak partekatua izan behar du, lurralde bezala erantzun behar diogu".
"Erreferente" izango den zentroa
AdinBerriren bihotza Pasaian kokatuko da, Hospitalilloko moila ondoan dagoen 4.747 metro karratuko eremuan eraikiko den azpiegituran. Hemen kokatuko diren eraikinetan egongo da zahartzaroari eta mendekotasunaren arretan erreferente izango den zentroa, arreta zentroa eta berrikuntza unitatea bere barnean izango dituena. Azpiegiturak 120 plaza izango ditu, 25 babestutako apartamentu eta eguneko zentroa. Eskainiko dituen zerbitzuak berritzaile eta aurreratuak izango dira, bai eraikinaren beraren ikuspegitik zein arretarenetik, pertsona erdigunean duen arreta eredua garatuko baitu. Helburua erabiltzailea etxean bezala sentitzea da. Berrikuntza unitateak, berriz, 500 metro karratu hartuko ditu, eta ikerketa eta frogetarako eremuak izango ditu. Plaza zabal bat ere izango du azpiegiturak, Pasaiako herri ingurunean integratuta egongo dena.
Olanoren ustetan, proiektuaren garrantzia Pasaialdez harantzago doa eta Gipuzkoa osoari egingo dio mesede: "Ekimen honekin, gure lurraldearen espezializazio maila hobetzea espero dugu, zahartze eta osasun arloko teknologien arloetako produktu, zerbitzu eta soluzioetan". Honela, Adinberrik erreferente bihurtu eta aurreratutako esperimentazio eremu bilakatzea du xede. Gero, arrakastatsuak diren esperientziak lurralde osora hedatuko dira. "Horregatik diogu proiektu hau martxan jartzea Gipuzkoa osoarentzako dela garrantzitsua", azpimarratu du foru arduradunak. Gainera, nabarmendu du zentroaren kokapena Pasaian egotea "ez dela kasualitatea", eta esan du: "Bere helburuen artean ere badago Pasaiako herritarrentzat portuko eremu ezberdinak berreskuratu eta biziberritzea". Honela, AdinBerriren bitartez, "Gipuzkoako Foru Aldundiak legealdi honetan estrategikotzat ditugun bi proiektu uztartzen ditugu: gure gizarte zerbitzuak indartu eta honela gure edadetuen bizi baldintzak hobetzea, batetik, eta Pasaialdeko biziberritzean eragitea, bestetik", adierazi du.
Egutegiari dagokionean, diputatu nagusiak azaldu du martxan direla jada azpiegitura gauzatzeko prozedurak. Honela, urte amaierarako proiektua idatzita izatea espero da, eta adjudikazioa eta obren hasiera datorren urteko maiatzerako espero dira. Lanek 36 hilabete iraungo dute eta, hau baieztatuz gero, instalazioak 2022 urtean irekiko lituzke bere ateak. Hala ere, Olanok azpimarratu du AdinBerri "datozen hilabeteetan" hasiko dela lanean. Izan ere, berrikuntza unitatea uda ostean jarriko da martxan, oraindik erabaki gabe dagoen kokapen batetan. "Bidearen hasiera honetan, argi daukagu AdinBerrik bere ekarpena egingo diola Gipuzkoak, bere osotasunean, biztanleriaren zahartzearen erronkari emango dion erantzunari", biribildu du.
