Anoeta estadioa berritzeko lanak hasi dituzte
Atzo goizean ekin zioten Anoetako estadioaren berritze lanen lehenengo atalari, eta bertan izan ziren Donostiako alkate Eneko Goia, Gipuzkoako diputatu nagusi Markel Olano, Eusko Jaurlaritzako kiroletako zuzendari Jon Redondo, eta Realeko presidente Jokin Aperribay.
Obren lehen unitateak, besteak beste, hurrengo bost hilabeteetan estadioaren kanpoaldea prestatzeko egingo dituzten lanak hartzen ditu. Lehenbiziko lan horiek, segidakoak izango dira: estadioaren ingurua obrarako egokitu, eskailerak eta elementu auxiliarrak egin, eta estadio berriaren kanpoko pilareen zimendatzea.
Eneko Goia, Marekl Olano, Jon Redondo eta Jokin Aperribay "pozik" azaldu dira, izan ere, "hirian aspaldi espero den obra hasiko baita donostiar zein gipuzkoar guztien onurarako".
Anoetako Estadioa 1993. urteko abuztuaren 13an ireki zen. Hortaz, hurrengo urtean 25 urte beteko ditu berritze prozesuan murgilduta. Lanak 2019ko urrian amaituko dira, eta estadioaz gain, besteak beste, segidakoak ere berrituko dira: Estadio txikia, Kirol Etxea, Ernest Lluch Kultura Etxea, eta federazioen lokalak.
Obrak 5 fase izango ditu eta, besteak beste, atletismo pistak kenduko dira, harmailak zelaira gerturatuko dira eta 42.000 ikusleentzako edukiera izatera arte handituko da. Estadioa berritzeko aurrekontua 47 milioi eurokoa da.
