Arkaitz Orbegozo: "Sortuko diren 25 postuak behin-behinekotasuna murrizteko garrantzitsuak dira"
Iragan astean egin zuten suhiltzaile izateko oposizioetako lehen azterketa. 25 postu irtengo dira, eta Arkaitz Orbegozok, Gipuzkoako suhiltzaileen zerbitzuburuak, OPE-aren inguruko xehetasunak eman dizkigu, besteak beste:
Zenbat langileendako postuak irtengo dira?
25 suhiltzaile postu aterako dira, oposizio-lehiaketa bitartez beteko direnak. Honek esan nahi du hasiera batean oposizio fasean baztertzaileak eta puntuagarriak diren zenbait froga pasa beharko dituztela eta ondoren merituak balietsiko dituen lehiaketa prozesua.
Ze behar beteko ditu OPE honek?
Beteko diren postuez gain, prozesu osoa gainditzen dutenek, behin zerrenda osatuta, suhiltzaile zerbitzuan izango ditugun ordezkapen beharrei aurre egiteko erabiliko den lan poltsa osatuko dute. Hortik ordezkatuko dira bajak, erretiroak, lizentziak eta beste edozein pertsonaleko beharrak.
Ze prestaketa, berezitasun izan beharko dituzte lana lortu nahi dutenek? Zeintzuk dira gainditu beharreko probak?
Printzipioz postuak bete ahal izateko derrigorrezko lehen hezkuntza izatea eskatzen da baina frogak prestatu ahal izateko gaitegia oso zabala eta konplexua da: sua eta bere itzalketarekin zerikusia duten gaiak, eraikuntza eta beren egiturak, lehen sorospenak, larrialdiekin zerikusia duen legedia, eta azkenik beste funtzionario guztiak bezala, legedi orokorrari buruzko zenbait gai ikasi behar dituzte. Frogak laburtuta hauexek dira:
Lehen ariketa azterketa edo froga idatzia izan da maiatzaren 25ean burutu zutena. Honek hiru zati zituen. Lehenengo azterketa teoriko bat 100 galderatakoa, oinarrietan agertzen zen gaitegiko 6 gai orokor eta 25 espezifikoren artean prestatua. Bigarren zatia 20 galderatako ariketa praktikoak, gaitegi espezifikotik ateratakoak. Eta hirugarren zatia Gipuzkoa eta bere geografiari buruzko 30 galdera: herriak, eskualdeak, mendiak, ibaiak, industria, garraio azpiegiturak, errepideak... Bigarren ariketa lau zatiz osatutako froga fisikoa izango da: sokatik igotzea, korrika egitea, igeri egitea eta arintasuneko zirkuitua. Hirugarrena, ariketa psikoteknikoa izango da eta azkenik laugarren ariketa bat gaitegian agertzen diren 9 lanbideei buruzkoa (zurgintza, galdaragintza, karrozeria eta mekanika, elektrizitatea, iturgintza, lehen sorospenak eta suhiltzaile lanbidea). Horren ondoren eta gainditu dutenekin lehiaketa hasiko da: merituak hartuko dira kontuan, suhiltzaile lanak egin izana batik bat.
Suhiltzaileen taldeetan egonkortasun gehiago lortzea eta Suhiltzaileen egitura indartzea da OPE honen helburuetako bat?
Bai; momentu honetan gure zerbitzua ez da administrazio osoan eta Aldundian bertan gertatzen denaren isla besterik. %38ko behin-behinekotasuna daukagu gure langileen artean eta 25 postu hauek behin-behinekotasun hori murrizteko oso garrantzitsuak dira. Espero dugu hemendik aurrerako prozesu jarraitu bat izatea eta hurrengo urteetan ere postu gehiago egonkortzen jarraituko dugula. Hori da gure xedea eta asmoa behintzat buruzagitzatik.
Mendi-inguruetako guneak indartzea izango da beste helburuetako bat?
OPE-aren kasua ez da mendi inguruetako guneak indartzea, izan ere beteko diren postuak Gipuzkoa osoko parkeetara bideratutakoak izango baitira. Baina bai esan beharra dago azken hilabeteetan mendi inguruko atentzio eta zerbitzua indartu dela Gipuzkoako Suhiltzaileen aldetik. Izan ere orain arte ez bezala, mendi erreskate eta bilaketetarako aktibazio automatikoa eskuratu du gure zerbitzuak SOS Deiak-en bitartez, orain datozen udaberri eta udako mendi irteeratan jazotzen diren traumatismo, ondoeza, bihotzeko eta horrelakoak azkarrago eta hobeto artatzeko helburuarekin.
Zenbat suhiltzaile daude gaur egun Gipuzkoan? Nola daude banatuta?
Gaur egun 148 suhiltzaile, 48 kabo, 16 sarjentu, 3 ofizialorde, 4 ofizial eta zentraleko 7 operadore daude alde operatiboan. Gainera, zerbitzua kudeatzeko beharrezkoak diren beste lanpostuak ere baditugu, administrariak, laguntzaileak, formakuntza arduradunak, mantentze lanetako arduradunak... Guztiak Gipuzkoa osoan dauden 8 suhiltzaile-etxeetan banatuta daude. 3 suhiltzaile eta kabo bat parke bakoitzeko Zubillaga, Goierri, Kosta, Oria, Korosti, Arrate eta Urolan, eta Bidasoa parkean 5 suhiltzaile eta kabo bat. Urteko 365 egunetan, 24 orduz, 38 pertsona daude guardian Gipuzkoan.
Zein da haien betebeharra? ez baita soilik suteak itzaltzea...
Suteak itzaltzeaz gain betebehar asko dituzte. Operatiboak ez direna alde batetik: ibilgailuak eta materiala behar bezala eta prest edukitzea –egunero gainbegiratzen eta ibiltzen dira–, esku-hartzetan erabiliko dituzten tresna eta prozedurak praktikatu eta ezagutzea, mantentze lan oinarrizkoak egitea eta ariketa fisikoa egitea. Gainera, prebentzio operatiboa deritzogun lanak ere burutzen dituzte, hidranteak errebisatu, enpresetara bisitak, simulakroak, ikastetxetako haurren heziketa eta sentsibilizazioa. Operatiboak direnen artean, suteak itzaltzeaz gain, erreskateak, ate irekitzeak, mendiko bilaketak eta erreskateak, trafiko istripuak, laguntza teknikoak (matxurak eta erorketak), ur horniketak… Asko dira betetzen dituzten lanak. Azken finean Gipuzkoan ematen diren eta osasun arloko edo sanitario hutsak ez diren larrialdiak kudeatzen dituzte eta aurre egiten diete.
