Aseguratze beharraren gaineko aholkularitza eskaini die Aldundiak udalei
Erakunde publikoen eta administrazioaren aseguratze beharrak izenarekin lan jardunaldia izan dute Foru Aldundian Gipuzkoako hainbat udaletako ordezkariek eta Eskolako kideek Gipuzkoako Aseguru Bitartekarien Eskolako kideekin elkarlanean. Aseguruak kudeatzerakoan erakundeek dituzten premien inguruko ikuspegi orokorra eskaintzea izan da jardunaldiaren helburu nagusia, baita larrialdiei aurre egiteko prestaketa ere. AXA aseguru enpresako kideak izan dituzte hizlari jardunaldian.
Udal askok, batez ere tamaina txikikoak, Aldundiarengana jo izan dutela laguntza eske ezbehar kasuetan adierazi du Imanol Lasa foru bozeramaileak, suteen edo meteorologiak eragindako istripu kasuetan, besteak beste: "Aldundiak eragile aktiboa izan nahi du prebentzioaren kultura zabaltzeko garaian, eta bere babesa eta aholkularitza eskaini nahi die udalerriei. Garrantzitsua da ezbeharren aurrean prestaturik egotea".
