Berdintasunari buruzko hausnarketa bultzatzeko esperientzia pilotua jarriko du abian Foru Aldundiak
Gunea, Partaidetzarako eta interlokuziorako Gipuzkoarako Berdintasun Gunea, jarriko du abian berriro Foru Aldundiak bi urtez geldi egon eta gero. Emakumeen eta gizonezkoen arteko berdintasunarekin zerikusia duten gaien eztabaida bultzatu nahi dute horrekin, erakundeen, emakume elkarteen, feminista sarearen eta esperientzian parte hartu nahi duten emakume guztien lankidetzarekin. Jatorrizko proiektuan sartuta zeuden 40 bat emakumeen elkartek parte hartuko dute e-Gunea plataforma birtualean eta, elkarte horiez gain, berdintasunaren alorrean interesa duten emakume guztiei ere egingo diete tokia.
Bi gairen gaineko eztabaida
Lehenengo bilera maiatzaren 30ean izango da (presentziazko lau bilera egingo dira urtean zehar), eta Gunea plataforman eztabaidatuko diren bi gaietako bat adostu eta zehaztuko dute. Foru Aldundiak proposatu du bigarren gaia genero indarkeria izatea, “egungo Emakumeen eta Gizonen Berdintasunerako Organoaren lerro estrategikoa” delako harendako.
Bi eztabaida horien ondorioak abenduan aurkeztuko dituzte, erakundearen etorkizuneko politikak bideratzea eta hobetzea delako horren helburua. Ondorio horietatik abiatuta erabaki politikoak hartzeko prozesuak bideratuko dituzte.
Parte hartzeko deia emakumeei
Gipuzkoako Foru Aldundiko Emakumeen eta Gizonen Berdintasunerako Organoko zuzendari Miren Elgarrestak adierazi du eraikuntzarako espazio bat dela: “Espazio irekia, malgua eta anitza, sortzailea eta hazteko bokazioa duena, presentziazko espazioen eta espazio birtualen bitartez lan egingo duena, eta ondorio oso zehatzak lortuko dituena”. Esperientzia pilotu horrek arrakasta izan dezan emakumeen parte-hartzea ezinbestekoa dela adierazi du: “Oso garrantzitsua da, berdintasun alorrean Gipuzkoa lurralde aurreratua izaten lagundu nahi duten emakumeen partaidetza datozen egunetan martxan jarriko den topaketa aitzindari eta berritzaile honetan”.
