Berrikuntza gaitasuna zahartze osasuntsuaren zerbitzura jarri gura du Aldundiak

ETORKIZUNA ERAIKIZ | 2018-11-26 08:11

Berrikuntza gaitasuna zahartze osasuntsuaren zerbitzura jarri gura du Aldundiak

 

Adinberri zahartze osasuntsurako estrategia "indartuta" atera da izen bereko Kongresuaren lehenengo ediziotik. Gipuzkoako diputatu nagusi den Markel Olanoren iritziz, argi utzi dute "beharrezkoak direla horrelako ekimenak, epe labur eta ertainean gizarte honek izango duen erronka nagusietakoa baita gizartearen zahartzearena". Gehitu duenez, Adinberri jada errealitatea den proiektua da, "Gipuzkoako berrikuntza gaitasuna zahartze osasuntsuaren zerbitzura jarriko duena". Helburua, betiere, lurraldea nazioarte mailako erreferente egitea da.

Tabakaleran egin den kongresuan 500 pertsona elkartu dira, batez ere, adinduen elkarte, enpresa, ezagutza eta berrikuntza eragile eta administrazio publikoetako ordezkariak. "Agerian geratu da gai honek sortzen duen kezka, baina baita Gipuzkoako gizarteak duen ekarpenak egiteko eta lanerako gogoa ere", esan du Olanok. Nazioarteko esperientziak jaso dira han, Erresuma Batua, Frantzia eta Portugalen dauden Adinberriren antzeko ekimenekin. Solasaldiak ere izan dituzte; lehenengoa zilarrezko ekonomiari buruz eta bigarrena ezagutza eta hezkuntzaren inguruan, betiere zahartze osasuntsua ardatz.

Mahai inguru batek itxi du topaketa. Parte hartu dute Olanok berak eta Osasun sailburu den Jon Darpon eta Nouevelle Aquitaineko erregio sailburu eta osasun eta zilarrezko ekonomiako delegatu den Françoise Jeanson doktoreak. Diputatu nagusiak kongresuaren balorazio positiboa egin. Nabarmendu dituen puntuen artean, partaidetza arrakastaz gain, zahartzaroaren erronkak dakartzan "ikuspegi ezkorrak" alde batera uzteko balio izan duela esan du. "Egia da gizartea zahartzen ari dela, eta honen eraginak kudeatzen hasi behar dugula. Baina, aldi berean, sekulako aukeraren aurrean gaude", defendatu du Olanok.

Bizitza-luzera eta zilarrezko ekonomia

Norabide honetan sakonduz, foru arduradunak esan du zahartzaroari buruz hitz egiterakoan bizitza-luzera eta zilarrezko ekonomia direla mahai gaineratu beharreko kontzeptuak. Lehen puntuari eutsiz, gogoratu du pertsonak gaur egun gehiago bizi direla eta baldintza hobeagoetan gainera, eta beraz "gizarte bezala ezin dugu utzi alferrik galtzen kolektibo horrek duen ezagutza, esperientzia eta ekarpenak egiteko gogoa". Arlo ekonomikoan, adierazi du adinduek behar berriak dituztela eta gaur egun dauden zerbitzuak hobetu behar direla, eta horrek "jarduera ekonomikoa sortzea" dakarrela; Europar Batasunaren mailan, sektore hau jada BPGdaren %29 da. "Aukera garrantzitsua dugu aurrean, eta aurrerapausoa eman behar dugu", itxi du.

Darponek, bere aldetik, esan du zahartzaroaren kontua ez dela arazoa bezala ikusi behar, baizik eta arrakasta bezala: "Daukagun bizitza esperantza lortzea munduko gizarte guztiek lortu nahi duten helburua da, eta ez dute askok lortzen". Honek guztiak egungo gizarte zerbitzuetan izango duen eraginari erreparatuta, esan du erronka dela administrazio ezberdinek eskaintzen dituzten zerbitzuak kanpora begira elkartzea, "erabiltzaileari berdin baitzaio nork eskaintzen duen edo ordaintzen duen zerbitzua". Gainera, Olanok bezala, zahartzaroaren inguruko industria garatzen jarraitzearen alde egin du, eta esan du Euskal Autonomia Erkidegoak (EAE) abantaila nabarmena duela alor honetan: "Erakundeak, industria eta ikertzaileak daukagun aukeraz jakitun garela”.

Azkenik, Jeanson doktoreak esan du ordezkatzen duen lurraldea, Nouvelle Aquitaine, Europako zahartze maila altuenetakoa duena dela, eta horrek neurri bereziak hartzera behartu dituela. Arduradun frantsesaren iritziz, berrikuntza da erronka honi aurre egiteko bidea baina, horretarako, adindu, ikertzaile eta politikarien artean sortu beharreko aliantzetan jarri du azpimarra: "Norabide berean joan behar dute". Gainera, mundura irtetearen garrantzia ere nabarmendu du, beste esperientziak ezagutu eta nazioarteko eragileekin lankidetza zubiak eraikitzeko, kasu honetan, Euskal Herria berarekin. Horretarako, esan du oso garrantzitsuak direla Adinberri Kongresua bezalako topalekuak.