Genero indarkeriaren aurkako kanpaina ezagutzera ematen dabil Aldundia, ikastetxeetan
Gipuzkoako Foru Aldundiko Berdintasun sailak Denok Zu genero indarkeriaren aurkako sentsibilizazio kanpaina jarri zuen abian pasa den azaroan. Kanpaina horren baitan, Miren Elgarrestak, Emakume eta Gizonen arteko Berdintasunerako Organoko zuzendariak, Arrasateko Erguin Herri Eskola bisitatu du.
Aldundiak ikusi zuen material egokia zegoela hezkuntza mailan zabaltzeko eta lanketa berezi bat egiteko. Hala, Denok Zu berrantolatu egin da, hezkuntzara bideratu da, eta genero indarkeriaren gaineko lanketa berezi bat egiten ari da orain Lehen Hezkuntzako lehenengo, bigarren, hirugarren eta laugarren mailako ikasleekin: "Emakumeekiko enpatia eta tratu onak lantzea da helburua, ikasleak bi balore horien garrantziaz kontzientziatzea", azaldu du Elgarrestak.
Nabarmendu du, oraindik, indarkeria txertatuta dagoela gure gizartean, eta halako kanpainen beharra ikusten du. Horregatik, hezkuntza gai honen lanketa egitea beharrezkoa dela deritzo: "Zoritxarrez, indarkeria gure gizartean oso txertatuta dago eta bereziki, genero indarkeria. Beraz, oso inportantea da hurrengo belaunaldietako neska-mutilekin lanketa bereziak egitea, zentzu honetan".
Azaroaren 25a helburu
Azaroaren 25ean, Emakumeen Nazioarteko Egunean izango du helmuga kanpaina honek. "Egun horretan, nahi duguna da, atxikimendu handi bat lortzea, eta Denok Zu kanpainak daraman mezua ahalik eta gehien zabaltzea. Egun horretan ekitaldi bateratu bat egitea gura dugu, lortu nahi dugun gizarteko sentsibilizazio mailara iristeko", zehaztu du Berdintasun zuzendariak.
Debagoienean zehar
Gipuzkoako 40 ikastetxe bisitatzea aurreikusten du Elgarrestak, azaroa bitartean. Gaur Arrasateko Erguin Herri Eskolan egon da eta bihar Oñatiko Elkar Hezi ikastetxean izango da. Datorren asteetan, berriz, Bergarako Mariaren Lagundia ikastetxea –irailaren 21ean, eguena–, Aretxabaletako Kurtzebarri eskola –irailaren 22an, egubakoitza– eta Eskoriatzako Arizmendi ikastola –irailaren 26an, martitzena– bisitatuko ditu.
