Ekimen sozialeko laguntzetara milioi bat euro baino gehiago bideratu du Aldundiak
Gipuzkoako Foru Aldundiak aurten milioi bat euro baino gehiago bideratu du (1.050.000 euro) ekimen sozialeko laguntzetara. Inklusio sozialeko proiektuak lehenetsi dira, eta 236 programa diruz lagundu dira, alegia, 2016ko deialdian baino 39 gehiago. Hori da Maite Peña Gizarte Politikako diputatuak ekarri duen datuetako bat gaur arratsaldean egin den Ekimen Sozialeko Elkarteen bileran. Gipuzkoako hirugarren sektoreko 40 elkarte baino gehiago bildu dira bertan. Topaketan zehar, Peñak talde handi honekin Hirugarren Sektore Soziala bultzatzeko estrategia diseinatzeko prozesua partekatu du; orobat jakinarazi die foru gobernua hirugarren sektore sozialeko zentroetako 2017-2020 aldirako inbertsio aurreikuspen bat onartzera doala. Diputatuak, halaber, adierazi du “lankidetzan” jarraituko dutela hirugarren sektorearekin politikak gauzatuz gizarte esku-hartzearen eremuan.
Hala, 2017an diruz lagunduko diren 236 proiektuak hiru jarduera ildo hauetan kokatzen dira: 1) Gizarte esku-hartze programak, 2) prebentzio eta sentsibilizazio programak eta 3) ikerketa eta berrikuntza programak. Entitate onuradun guztiei dagokienez, 107 izan dira -2016an baino 14 gehiago-. Arreta talde hauetan banatzen dira: desgaitasuna eta mendekotasuna, adinekoak, familia, haurrak eta nerabeak, gizarteratzea, indarkeria matxistaren emakume biktimak, besteak eta boluntarioak.
2017ko deialdirako, hasieran, 850.000 euroko gastu bat onartu zen, honela banatuta: gizarte esku-hartzeko programak (720.000 €), prebentzioa eta sentsibilizazioa (110.000 €) eta ikerketa eta berrikuntza programak behar sozial berriak eta arreta sozialak identifikatzeko (20.000 €). Alabaina, eskaerak aurkezteko epea amaituta, eta horiek aztertuta, ikusi zen baimendutako kreditua ez zela nahikoa aldeko balioespena jaso zuten eskaera guztiei erantzuteko. Maite Peñak azaldu duenez, igo egin da diru lagungarriak diren progamen kopurua 1. eta 2. ildoetan. "Igoera horren arrazoia izan da 2016-2020 Elkar-Ekin gizarteratzeko plana abiarazi izana, gizarte erakundeekin, udalekin eta beste erakunde publiko batzuekin batera".
Hori dela eta, Gizarte Politikako Departamentuak proposatu zuen, eta hala onartu zen, 2017ko deialdia 200.000 euroan igotzea: 100.000 € 1. ildora eta 100.000 € 2. ildora. Zentzu honetan, diputatuak aurreratu du 2018ko aurrekontu proiektuak igoera horri eustea aurreikusten duela ekimen sozialeko diru-laguntzetarako.
