Beasaingo Indar enpresaren historia biltzen duen Etorkizuneko sustraiak liburua aurkeztu dute Aldundian
Indarren iraganaren eta etorkizunaren gaineko gogoeta liburua idatzi du Javier Barajas zarauztarrak enpresaren 75. urteurrenean, eta Gipuzkoako Foru Aldundian aurkeztu zuten apirilaren 7an. Aurkezpen ekitaldian elkartu ziren Markel Olano, Gipuzkoako diputatu nagusia; Aitor Aldasoro, Beasaingo alkatea; Alex Belaustegi, Indarreko kontseilari aholkularia; eta Javier Barajas, liburuaren egilea.
Historia eta arrakasta eredugarriak
Diputatu nagusiak zoriondu egin zuen Beasaingo konpainia urteurrenagatik eta “energiaren alorrean mugarri bilakatzeagatik”. Alor energetikoa Aldundiaren alor estrategikoetako bat dela adierazi zuen: “Indarren historia eta arrakasta eredugarriak dira alorraren etorkizunerako eta gure apustuen diseinurako”. Eta Gipuzkoako ehun industrialaren garapenean izan duen rol garrantzitsua nabarmendu zuen, “lanpostuak eta kalitatezko produktuak eskainiz”.
Bestalde, Aitor Aldasoro Beasaingo alkateak azpimarratu zuen bai eskualdeari, bai Beasaini liburuak egindako ekarpena: “Bertako izaera aldarrikatzen du, deslokalizazioaren mehatxuaren aurrean”. Hori horrela, Aldasorok enpresaren tokikotasuna eta udalerriarekin beti izan duen konpromisoa eskertu zituen.
Alex Belaustegik, Indarren ordezkari legez, erakundeen eta elkarteen lankidetza eskertu zuen. Era berean, etorkizunera begira dituzten erronkei aurre egiteko “enpresa zein langileak ondo prestatuta” daudela berretsi zuen, eta garatu beharreko alderdien artean aipatu zituen produktuen dibertsifikazioa, merkatu berriak bilatzea eta inbertsio teknologikoa.
Javier Barajas idazleak bere aldetik aitortu zuen erronka izan zela Goierriko eta Gipuzkoako enpresarik garrantzitsuenetako baten nondik norakoak kontatzea. Liburuak, euskaraz eta gaztelaniaz idatzita, 300 orri ditu. Eta bertan jaso ditu enpresarekin harremana duten dozenaka elkarrizketa eta 500 bat argazki.
