2018ko aurrekontuak lantzeko prozesua jarri du abian Foru Aldundiak
Foru Aldundiaren 2018ko aurrekontuen osaketan parte hartu ahal izango dute gipuzkoarrek ekainaren 30a bitartean. Herritarren "lehentasunak eta proposamenak jasotzea" du helburu Aldundiak, aurrekontuetan sartzeko horiek. Iaz ere egindako "prozesua indartzeko" asmoarekin, ekarpenak jasotzeko epea luzatu egin dute –bi hilabete iraungo du–, eta baita ekimenak bisitatuko dituen herrien kopurua igo ere. Hain zuzen hori da berritasun nagusietako bat; aurten 37 herritan izango dira foru ordezkariak, iaz baino 21 gehiagotan. Eta herritarren iradokizunak bertatik bertara jasoko dituzte.
Karpa herriz herri
Urnietan eman diote hasiera ekimenari eta Donostialdean jarraitu du; ondoren eskualde guztietara eta herri askotara iritsiko dira, eta bisiten egutegia webgunean dute zehaztuta. Herri horietan karpa jarriko du Aldundiak 10:00etatik 19:00etara bitartean aurrekontuen berri emateko, zalantzak argitzeko eta proposamenak jasotzeko, eta arretarako teknikariekin batera izango dira Imanol Lasa foru bozeramailea eta Joseba Muxika Herritarren Partaidetzako zuzendaria.
Proposamenak aurkeztu ahal izango dituzte 16 urtetik gorako herritar guztiek esku orria bete eta karpan utzita, tokian tokiko erregistroetan, eta Gipuzkoa Plazan kokatutako herritarren arretarako eta informaziorako gunean. Guztira 300.000 esku orri inguru bidali dituzte Gipuzkoako etxeetara, "herritarrei ahalik eta erraztasun gehien emateko". Horrekin batera, Aldundiaren datu eta proiektu nagusien berri ematen duen mapa ere zabaldu dute.
