Gastronomia digitalaren berrikuntza laborategia 2019an abian izango da
Etorkizuna eraikiz egitasmoaren barruan Gipuzkoako Foru Aldundiak, Eusko Jaurlaritzak, Donostiako Udalak, Basque Culinary Centerrek eta Tabakalerak elkarlanean eginiko LABE proiektua aurkeztu dute. Gastronomia digitalaren berrikuntza laborategi berria hain zuzen.
Donostiako Tabakaleran kokatuko da eta 1.400m2 izango ditu bi solairutan banatuta. Ikerketa laborategi bat eta teknologia berriekin esperimentatuko duen 4.0 jatetxe aurreratu bat izango ditu besteak beste. Esaterako jatetxean sartu eta menua zuzenean ukimen pantaila baten bitartez eskatzeko aukera izango da.
Egun, Gipuzkoa gastronomia alorrean mundu mailako erreferente da eta proiektu honen helburua hala izaten jarraitzea da.
Laberen aurkezpen ofizialean gastronomia munduan aliantzak kendu eta esperimentazio aktiboa erabiltzearen alde egin dute erakundeetako arduradunek.
Markel Olano Gipuzkoako Diputatu Nagusiaren esanetan LABE pertsonak, gastronomia eta teknologia berriak lotuko dituen proiektua da. Non jakiak sortu, ikertu, esperimentatu eta balidatuko diren.
Bestalde, gaineratu du gastronomia gipuzkoarren identitatearen eta ADNaren parte dela eta egun nazioarte mailan erreferente garen arren, estatus hori mantendu ahal izateko berrikuntza ezinbestekoa dela. Hain zuzen, iraultza digitala sektore guztietara ari dela heltzen eta gastronomia ez dela salbuespen bat.
Edurne Ormazabal Tabakalerako zuzendari nagusiak gaineratu du oso berri pozgarria dela hau Tabakalerarentzat, kultura garaikidearen nazioarteko zentroa izanik LABE proiektua erabat bat datorrelako Tabakaleraren lerro estrategikoarekin.
Amaitzeko, Eneko Goia, Donostiako alkateak ere hitz onak izan ditu proiektuarentzat, bai Tabakalerarentzat eta bai Donostiarentzat oso proiektu onuragarria dela azpimarratu baitu.
LABE proiektuak 2,3 milioi euroko aurrekontua du eta Aldundiaren, Eusko Jaurlaritzaren eta Donostiako Udalaren artean finantzatuko dute. Kudeaketaz berriz, Basque Culinary Center arduratuko da.
Aurreikuspenen arabera LABE laborategia 2019ko lehen seihilekoan egongo da martxan.
