'Gipuzkoa berdinago' egitasmoaren lehen bilera egin du Aldundiak erakundeetako ordezkariekin
Gipuzkoako gizarte, ekonomia, kirol eta unibertsitate arloko hainbat ordezkari, besteak beste, Osakidetza, Kaiku, Mondragon, Adegi eta Real Sociedadeko kideak, Markel Olano diputatu nagusiarekin elkartu dira Gipuzkoa berdinago egitasmoaren baitan. Jendaurreko hizkuntza portaera bateratzea adostu eta praktikan jartzeko helburua du lan talde horrek "hizkuntza berdintasunean sakondu eta eredu orekatuagoak gizarteratzeko".
Lurraldeko bi hizkuntzen erabilera ez dela orekatua adierazi du Olanok: "Esparru batzuetan euskararen presentzia oraindik txikia da, nahiz urratsak egiten ari garen. Herritarrari bermatu nahi diogu bi hizkuntza ofizialetatik nahi duenean jarduteko askatasuna, baina gaur gaurkoz errealitateak erakusten du aukera hobeak daudela gaztelaniaz". Hori horrela, gizartean prestigioa duten erakunde erreferenteengana jo dute jakinik horien eragina biderkatu egiten dela gero.
Jokabide egokiak adostu
Gipuzkoa berdinago egitasmoaren helburua da lurraldean erreferentzia diren erakunde batzuk elkartu eta gizartearen aurrean orekaren bila eredugarri izan litezkeen jokabide egoki batzuk adostea. Soziolinguistika Klusterrak eramango du dinamikaren gidaritza teknikoa, eta datozen hilabeteetan antolatuko dituzten lan saioetan jendaurreko komunikazioko esparru jakin bat landuko dute.
Soziolinguistika Klusterra dinamizatzen dabilen Jendaurrean erabili proiektuari ekarpena egingo dio hain zuzen, abian jarritako egitasmo horrek. Ikerketa eta ekintza uztartuz eta erakunde eta enpresen arteko elkarlanarekin enpresen jendaurreko euskarazko komunikazioan laguntzeko baliabideak eskaintzea da proiektu horren helburua.
Gipuzkoan elebidunak direnen kopurua beste lurraldeetan baino nabarmenki handiagoa dela jakinarazi du Foru Aldundiak, eta joera hori areagotuz doala dio: "Gero eta aukera hobeak eskaintzen ditu euskara eta gaztelaniaren arteko berdintasun soziala bilatzeko eta bi hizkuntzen erabileran oreka eta eredu berriak praktikan jartzeko".
