Hezkuntza sistemaren eraldaketaren erantzule direla ikastolak adierazi du Markel Olanok Kilometroak 2017an
Gipuzkoako ikastolen aldeko jaiak euskal herritar mordoa elkartu ditu Oñatin. Eguraldia lagun, giro bikaina sortu da lau gunerekin osatutako ibilbidearen bueltan, eta bisitariek gozatu egin dute antolatutako ekitaldiekin, besteak beste, Nazioarteko Artzain Txakur Txapelketa, gazteentzako Erronka lehiaketa, umeendako jolasteko espazio handiak eta askotariko kontzertuak.
Markel Olano, Gipuzkoako diputatu nagusiak ere bat egin du Kilometroak Jaiarekin. Euskara bidegurutzean dagoela adierazi du: "Arriskuak eta aukerak ditu euskarak eta arriskua da kaleetan galtzen ikustea". Horren aurrean erreakzionatu beharra dagoela azpimarratu du, eta erakunde publikoek eta hezkuntza eragileek elkarlanean landu behar dutela bide komuna.
Ikastolek hezkuntza sisteman izan duten garrantzia ere azpimarratu du diputatu nagusiak. "Ikastolak aitzindari ziren duela 40 urte. Ni ikasle nintzelarik Beasaingo ikastolan, lehen eraldaketa pedagogikoa bizi izan nuen. Eta orain, hezkuntza sistemaren eraldaketaren erantzule dira. Konfiantzaren Pedagogian oinarritutako pedagogia berritzaileak Debagoienean du jatorria, gainera".
Era berean, boluntarioen lana ipini du balioan. "Herri mugimendutik etorriko da hezkuntza sistemaren biziberritzea. Herrigintzaren eta auzolanaren inguruan osatuko da gure herriaren etorkizuna".
