Hizkuntza ohituren gainean egingo dute gogoeta Udaletako Euskara Zerbitzuen Topaketan
Udaltop Udaletako Euskara Zerbitzuen Topaketak bederatzigarren edizioan hizkuntza ohiturak landuko dituzte. Lasarte-Oriako Manuel Lekuona kultur etxean egingo da, maiatzaren 11n eta 12an.
Esperientzien berri jaso
Orain arte egindako, egiten ari diren eta egin nahi diren esperientzia berriak izango dira topaketaren helduleku nagusiak. Eta esperientziekin batera, orain arte egin diren ikerketen berri ematea da Lasarte-Oriako Udalaren, Gipuzkoako Foru Aldundiaren eta Eusko Jaurlaritzako Hizkuntza Politikako Sailburuordetzaren asmoa. Zer dira ohiturak? Eta hizkuntza ohiturak? Hizkuntza portaerak aldatzeko ekimen sozialek lagunduko al lukete euskararen erabilera areagotzen? Galdera horiek eta antzeko beste batzuk erantzungo dituzte.
Estibaliz Alkorta, Eusko Jaurlaritzako Kultura eta Hizkuntza Politikako Euskara Sustatzeko zuzendariak, aurtengo gaiaren zergatiaren berri eman du: “Ohartu gara azken aldian hizkuntza ohiturak aldatzeko xedez esperientzia ugari eman direla. Horrelako asko, gainera, gizarte eragileen esparrutik etorri dira. Esperientzia horiek guztiak hizkuntzaren normalizazioan diharduten arduradun tekniko, politiko eta gizarte mugimenduetako ordezkariei nola mamitu diren azaltzea interesgarria iruditu zaigu”.
Era berean, Mikel Irizarrek, Gipuzkoako Foru Aldundiko Hizkuntza Berdintasunerako Zuzendari Nagusiak, Udaltopen balioa azpimarratu du, eta bederatzi urteko ibilbidean “erreferentziazko topaketa” bihurtu dela nabarmendu du: “Batetik, egunerokoan langai ditugun horiei erantzunak ematen ahalegintzen delako eta guztiok egiten dugun lana hobetzea bilatzen duelako; eta bestetik, publikoaren fideltasuna lortu duelako”. Eta aurtengo gaiak “parte-hartzaileen interesa” piztuko duelakoan dago.
