Informatikari eskainitako Gipuzkoako topaketa handienak zabaldu ditu ateak
Informatika-gaien eta teknologia-zaleen Gipuzkoako topaketa martxoaren 9a eta 11 bitartean egingo da Tolosan, eta 600 parte-hartzaile elkartuko dira. Zibersegurtasuna izango du ardatz nagusi aurtengoak, eta arrisku informatikoak nola ekidin ikasteko doako hitzaldiak eta tailerrak eskainiko dituzte. Horiez gain, arte digitaleko, software libreko eta hardwareko txapelketak egingo dira, baita bideo-jokoak ere. Parte-hartzaileekin batera Foru Aldundiko ordezkariak ere, Markel Olano diputatu nagusia besteak beste, gerturatu dira irekiera ekitaldira, bertatik bertara ezagutzeko aurtengo topaketak dakarrena.
Hamabi urte informatikaren bueltan
Hamabi urte bete ditu Gipuzkoa Encounter topaketak eta inoiz baino egitarau erakargarriagoa gertatu dute hori ospatzeko. 400 eserleku jarri dituzte aurten parte-hartzaileen eskura, eta beste behin, hamabost segundo eskasetan erreserbatu dituzte horiek. Sarrerarik lortu ez dutenek sarean konektatu eta jarduera guztietan parte hartzeko aukera emango dien eguneko sarrera eros dezakete, baita Opengune eremu irekira bertaratu ere. Doako hitzaldi eskaintza zabala izango da hor, arte digitalaren eta droneen eraikuntzaren gainekoak, esaterako; aurreko urteetan arrakasta handia izan du Openguneak joko, stand eta prestakuntza-tailerren gunean giro bikaina sortu izan dutelako ehunka bisitarik. Eta egunotan Tolosako Usabal kiroldegira gerturatzen direnek errealitate birtualaz zein droneen hegaldiaz gozatu ahal izango dute, baita azken teknologia-berrikuntzez ere. Aurten, gainera, aparteko arreta jarri dute zibersegurtasunaren inguruan eta hitzaldi asko izango dira enpresa txikientzat zein partikularrentzat.
Konexio-abiadura handiko topaketa
Estatuko informatika-topaketa azkarrenetarikoen artean dago Gipuzkoa Encounter. Izan ere, Euskaltelek Usabal kiroldegian ezarri duen sare informatikoak parte-hartzaileei segundoko 10 gigako konexio-abiadura eman die. Euskaltel Konekta fundazioak parte-hartzaileentzat antolatutako ekintzen artean daude arte digital, programazio, bideo-joko, software libre eta hardware txapelketak, baita bertaratuen sormena pizteko eta elkar ezagutzeko aisialdi jarduerak ere.
Euskaltel Konektak antolatutako partyaren laguntzaile dira Euskaltel, Tolosako Udala, Gipuzkoako Foru Aldundiko Ekonomia Sustapeneko, Landa Ingurumeneko eta Lurralde Orekako departamentua, eta Eusko Jaurlaritzako Ekonomiaren Garapen eta Azpiegitura saila, SPRIren bitartez.
