Legealdiko bigarren zatiari Gipuzkoa "lehiakor eta solidario" bat eraikitzeko erronkarekin ekin dio Foru Aldundiak
Legealdi erdiko balantzea egin zuen atzo Markel Olano diputatu nagusiak, Donostiako Tabakaleran elkartu ziren gizarteko, ekonomiako eta politikako 300 ordezkariren parte-hartzearekin egindako ekitaldian. "Legealdiko bederatzi helburu estrategiko nagusiak bideratu dira dagoeneko lehen bi urte hauetan", eta "hemendik aurrera foru erakundeak bere aktibitatean lehenetsiko du gizartearen eta ekonomiaren ikuspegitik etorkizunera begira lurraldeak dituen desafioei aurre egitea", laburbildu zuen Olanok
“731 eguneko lanaren ondoren, hitza bete dugula baieztatu dezakegu, bete ditugula hartutako konpromisoak, hauteskundeetan babes zabala jaso ondoren. Gure lurraldea blokeo egoeratik ateratzeko ezinbestekotzat jotzen genituen proiektuak dagoeneko gauzatzen ari dira edo bideratuak daude. Etorkizunera begira jartzeko unea da, etorkizuneko Gipuzkoa eraikitzeko unea. Eta horretarako estrategia bat abian jarri dugu, gure gizartean aski errotuta dauden bi balio nagusiren gainean: lehiakortasuna eta elkartasuna”, adierazi zuen diputatu nagusiak.
Gipuzkoako diputatu nagusiak gidatu zuen bilkuran, Aldundiaren lorpen nagusien berri emateaz gain, "lurraldeak azken 24 hilabete hauetan bizitako bilakaera sozial eta ekonomikoa" izan zuten aztergai. Horretarako, hitza hartu zuten Kultura, Turismoa eta Gazteriako foru diputatuak, Denis Itxasok, eta gizarte zibileko lau ordezkarik: Iñigo Diaz de Cerio ekintzaileak; Raquel San Sebastianek, Gureakeko ordezkari gisa; Alex Bengoak, IK-4 Teknikerreko zuzendari nagusiak, eta Henar Alcaldek, Orkestra Lehiakortasuneko Euskal Institutuko kideak.
Olanok azpimarratu zuenez, foru gobernua osatzen duten alderdiek erabaki zuten gobernu “indartsu eta sendo bat” osatzea, “gaitasun profesional handikoa”, eta “lehen minututik” 2015-2019 Kudeaketa Plan Estrategikoan jarritako norabidean gogor lanean jardun dutela azaldu zuen. Bide-orri horretan ezarritako bederatzi proiektu estrategikoak “modu egoki batean” aktibatu eta gauzatze bidean daudela gogorarazi zuen –Ekonomia Suspertzeko Plana, Gizarte Zerbitzuen Mapa, hondakinen arazoari irtenbidea bilatzea, Donostialdeko Topoa, Pasaialdearen biziberritzea, Tabakalera, Deskargako autobidea, Gobernantza Berriko estrategia eta balio demokratikoetan eta bizikidetzan sakontzeko estrategia–.
Diputatu Nagusiak nabarmendu zuen Gipuzkoako ekonomia ehuna lagundu eta ekonomiaren susperraldia finkatzeko egindako lana, gainontzeko erakunde eta lurraldeko eragile sozial eta ekonomikoekin elkarlanean. Xehetu duenez, alor honetan abian jarritako lanak Ekonomia Suspertzeko Plana izan du oinarri, batetik, eta fiskalitate aurreratu bat eta lurraldeko azpiegituren modernizazioa, bestetik. Horren lekuko, Olanok gogoratu zuen dagoeneko "420 enpresa eta 1.800 lanposturen sorrera bultzatu dela egitasmo honen bitartez; zerga iruzurraren aurka aritzeko 45 kontratazio berri bultzatu direla eta Deskargako obrak martxan daudela dagoeneko, gisa horretan Gipuzkoako biribilgunea amaitzeko bidean jarriz".
“Aurrean dugun testuinguru ekonomiko berriak aukera ematen digu eta behartzen gaitu apustu berriak egitera. Eta hor anbizioz jokatuko dugu, gure ekonomia ehuna etorkizunera begira jarriz. Horregatik apustu sendoak egingo ditugu datozen hilabeteetan, lau eremu estrategikotan: fabrikazio aurreratua, biozientziak, energia eta mugikortasuna eta gastronomia”, aurreratu zuen.
Etorkizunera begira, Gipuzkoan 80 urtetik gorako biztanleen konpurua egungo 49.000tik 56.000 igoko dela estimatzen da. Adin tarte horretan 7.000 lagun gehiago kokatuko dira, beraz. “Lehen mailako desafio baten aurrean gaude. Helburua da pertsona horiek guztiek arreta egokia jasotzea, emandako zerbitzuaren kalitatea bermatuz, eta horretarako politika integralak ditugu martxan. Bide horretan pauso bat aurrera emango dugu eta arreta eredu oraindik eta gizakoi eta pertsonalizatuagoak eskainiko ditugu”, jakinarazi zuen Markel Olanok.
