Loiola Batailoiko gudari Andres Egaña eta Inazio Ernabide omendu dituzte Bergaran
Bergarako udaletxeko areto nagusia txiki geratu da Andres Egaña eta Inazio Ernabide herrikideen omenaldi ekitaldian. Udalak eta Intxorta 1937 Kultur Elkarteak eskaini die omenaldi hori Loiola Batailoiko gudari izandako bi bergararrei.
Herritarren berotasuna
Ekitaldian izan dira Elena Lete alkatea, Gipuzkoako Foru Aldundiko Bizikidetzaren eta Giza Eskubideen zuzendari nagusi Maribel Vaquero eta Intxorta 1937 Kultur Elkarteko ordezkari Juan Ramon Garai. Bestalde, ikusleen artean zeuden, besteak beste, Gogora Institutuko zuzendari Aintzane Ezenarro, eta Eusko Jaurlaritzako sailburu ohi eta Donostiako zinegotzi Miren Azkarate.
Era berean, herritar ugari elkartu da aitortza ekitaldian. Nola ez Egañaren eta Ernabideren senitarteko eta lagun asko, baina baita Loiola Batailoian borrokatutako bergarar askoren senitartekoak ere. Azken batean, 36ko gerran borrokan egindako bergarar guztien luzatutako aitortza izan da. Memoria historikoa berreskuratzeko lanean diharduten taldeetako ordezkariak ere asko izan dira.
Opariak omenduei
Egañaren eta Ernabideren testigantzak jasotzen dituen bideo bat eman dute ekitaldian eta aurreskua dantzatu ostean opariak jaso dituzte omenduek; esanguratsuena, Loiola Batailoiko bandera bana.
Bi omenduek ondo gogoan dituzte bizi izandako urte latzak. Umorez eta gorrotorik gabe kontatzen dituzte orduko kontuak, "liburu bat idazteko beste istorio ditugu guk kontatzeko", adierazi dute.
