Markel Olanok ALCAD enpresa bisitatu du, langileen ongizatea lantzen duten 20 esperientzia pilotuetako bat
Markel Olano diputatu nagusiak, Miren Elgarresta Emakumeen eta Gizonen Berdintasunerako Organoaren zuzendariak, eta Sebas Zurutuza Kudeaketa Estrategiako zuzendariak Irungo ALCAD Electronics enpresa bisitatu dute gaur, Gipuzkoan kontziliazioa eta berdintasuna sustatzeko Etorkizuna Eraikiz egitasmoaren barruan, esperientzia pilotuak garatzen dituzten 20 enpresetako bat baita. Aldundiaren helburu nagusia da Gipuzkoa lurralde aurreratua eta lehiakorra izatea, kontuan hartuta pertsona eta horren ongizatea dela bere politika guztien ardatza. Olanok bermatu du Aldundia, lurraldeko hainbat enpresa eta eragilerekin batera, lanean ari dela Gipuzkoa izan dadin, Europa mailan, pertsonen arteko desberdintasun gutxiena duen lurraldea, "eta horretarako ezinbestekoa da emakumeen eta gizonen arteko kontziliazioa eta berdintasuna sustatzea", erantsi du. Halaber, adierazi du kontziliazio pertsonala eta lan-kontziliazioa funtsezkoak direla sustapen ekonomikoa finkatzeko, kontuan izanik hori dela Aldundiaren helburu estrategikoa.
Emaitza onak
Etorkizuna Eraikiz ekimenak esperimentazio proiektu desberdinak ditu, eta guztira 3.500 langilek parte hartzen dute bertan; pertsona horien ardura izango da soluzio zehatzak, errealak eta eraldatzaileak identifikatzea eta aplikatzea, Gipuzkoak etorkizunean izango dituen erronkei aurre egin ahal izateko. Ezarri diren proiektuen artean, kontziliazio eta berdintasunaren alorrean lan egiten duten 20 enpresak daude. Horrela, GipuzkoaLab-ek, gizartearen ordezkaritza organoak, horietako 10 aukeratu ditu aipatutako eremuan, aurten bertan, lanean has daitezen. Gainerako 10 proiektuak, dagoeneko martxan daudenak, emaitza oso onak lortzen ari dira, eta emaitza horiekin kontrolak egin nahi dira berdintasunaren eta kontziliazioaren alorreko hurrengo politika publikoak ezartzen lagunduko duten neurrien inguruan.
Lehen fasean aukeratutako 10 enpresak Gipuzkoako sektorekako konposizioaren ordezkari dira, proiektuaren azterketa fasean egindako enpresa-erradiografiaren arabera. Enpresa horien hautaketa zehaztasun handiz egin zen, Gipuzkoako enpresa ereduen ordezkaritzat jo daitezkeen enpresa traktoreak hautatzeko eta, ondorioz, gainerako enpresek haiek ordezkari gisa hartzeko. Hauek dira hautatutako enpresak: Alcad, Alcorta, Angulas Aguinaga, Askora, Bera Bera, Ikor, Ikusi, Erreka, Uliazpi eta Gipuzkoako Foru Aldundia bera.
Proiektu horiek prestatzeko, lehendabizi enpresen hasierako diagnostikoa egin zen, berdintasunaren eta kontziliazioaren esparruan enpresa horiek dituzten gabeziak antzemateko eta, horrela, bakoitzari hobeto egokitzen zaizkion proiektu pilotuak proposatzeko. Antzemandako gabeziei aurre egiteko, enpresen kudeaketa integrala (laneko antolaketa eta denborak, kudeaketa aurreratuen sistemak, etab.) nahiz sail zehatz batzuen zereginak kontuan hartzen dituzten neurriak hartuko dira.
ALCAD enpresan lan giroa hobetzen
Alcad enpresaren kasuan, esperientzia pilotuaren helburua da lan giroa eta enpresako langileen ongizatea hobetzea, horretarako behar diren kontziliazio neurriak ezarrita eta balioan jarrita. Horretarako, hiru ekintza-lerro gauzatuko dira. Alde batetik, prestakuntza zentroekin ari dira lanean, telekomunikazioen alorrean langile espezializatuak erakartzeko aukerak gehitzeko xedez, betiere kontuan hartuta emakumeen partaidetza sustatu behar dela eskaera gehieneko diziplina profesionaletan. Bestaldetik, kontziliazio alorreko neurri berriak balioan jartzeko eta ezagutzera emateko ahaleginetan ari dira, lan giroa hobetzeko eta enpresaren produktibitatea gehitzeko ardatz gisa hartuta: lan ordutegia malgutzea, udan lanaldi murriztua izatea, bilera orduak egokitzea, etab. Eta azkenik, enpresa-kulturaren kudeaketa garatzen dute, beharrezkoa baita berdintasunaren eta kontziliazioaren terminoak enpresa-kulturan sartzea, balio erantsi eta desberdintze gisa.
Xabier Isasi ALCAD Electronics enpresako zuzendari exekutiboak eskerrak eman dizkie langileei beraien partaidetza eta komunikazio bikainarengatik, "izan ere, ezarri ditugun estrategiek ez lukete inolako zentzurik izango denon inplikaziorik gabe". Isasiren ustez, kontziliazioaren aldeko neurriek erantzuna emango diote talentua gordetzeko erronkari, "enpresak ezin baitu balio hori baztertu", esan du. Halaber, ALCAD enpresak emakume eta gizonen arteko berdintasunezko ordezkaritzaren aldeko apustua egin du ofizial eta espezialisten profil profesionaletan, eta Isasi jaunak adierazi duenez, prestakuntzaren eta barne sustapenaren alde egingo dute emakumeei zuzendutako profil administratiboen eta ingeniarien kasuetan, aurrerantzean zuzendaritza postuak bete ahal izateko.
Bestalde, Miren Elgarrestak esan du ALCAD enpresak konpromiso maila handia azaltzen duela enpresan kontziliazioa eta berdintasuna sustatzeko neurriak abian jartzeko orduan. Aldi berean, zorionak eman dizkio Irungo enpresari hartu dituen neurri berritzaile eta lehiakorrengatik. Azkenik, gogoratu du Aldundiak aurkeztu berria duela Gipuzkoako Kontziliazio Erantzunkiderako I. Foru Plana, Etorkizuna Eraikiz proiektua osatzeko sustatzeko prestatu dena; izan ere, "berdintasun alorrean, lurralde aurreratuenen artean kotatu nahi dugu Gipuzkoa" erantsi du.
