"Oinarri sendoekin" bete du LagunAro, EPSVk 50 urteko ibilbidea
LagunAro, EPSVren ibilbide historikoari atzera begiratua eginda eta aurrera pausoak zehaztuta ospatu dute Arrasaten kooperatibaren mende erdia. Iñigo Urkullu lehendakaria izan da ospakizunaren buru, eta ondoan izan ditu LagunAro EPSVko lehendakari Jose Antonio Alustiza, zuzendari nagusi Luis M. Ugarte, eta Mondragon Korporazioko lehendakari Iñigo Ucin.
Agintari ugari ere izan dira bertan, hala nola Bakartxo Tejeria, Eusko Legebiltzarreko lehendakaria; Markel Olano, Gipuzkoako ahaldun nagusia, Maria Ubarretxena, Arrasateko alkatea; M. Jesus Carmen San Jose, Lan eta Justiziako sailburua; eta LagunArori atxikitako kooperatibetako ordezkariak, gizarte aurreikuspen osagarriaren sektoreko ordezkariak (BGAEak eta mutualitateak) eta gonbidatu ugari.
Ongizate sistema
LagunAro EPSV irabazi asmorik gabeko erakundea da, eta bere jarduera nagusia da kooperatibetako bazkideen eta euren senideen kolektiboaren babes soziala, Gizarte Segurantzako Sistema Publikoaren antzeko irismenarekin. Mutualistei asistentzia eta aurreikuspen soziala ematen die, estaldura sistema misto baten bitartez, horren barruan daudela LagunAroren berezko prestazioak eta Gizarte Segurantzarenak, Langile Autonomoen Erregimen Bereziaren bitartez.
Jose Antonio Alustiza lehendakariak adierazi du, LagunAroren historia etengabe egokitzeko ariketa baten ibilbidea dela. Eredua definitzerakoan zera adierazi du: "Etengabe egokitzen diharduen sistema berezi eta bakana da, eta bere helburu saihestezina da gure kolektiboari ongizate sistema egoki bat ematea, non pertsonak diren ardatz nagusia".
Zuzendari nagusiak, berriz, Luis Mari Ugartek, gaur egungo egoerari eta etorkizuneko erronkei egin die erreferentzia, eta azkenaldiko krisirik gogorrenari, Fagorren itxierari, nola aurre egin dioten azaldu du, besteak beste: "Une hartan, batzuek ia hildakotzat ere jo gintuzten. Hala ere, berehala ekintza plana jarri genuen martxan, eta kooperatibek eta bazkideek erantzun eredugarria eman zuten".
Iñigo Urkullu lehendakariak, bere aldetik, eredutzat jo ditu LagunAroren eta, oro har, kooperatibismoaren jardunbideak.
Hainbat omendu ekitaldian
LagunAro EPSVko lehendakari ohi Roman Balanzategui, Jesus Goyeneche eta Jose Antonio Ajuria omendu dituzte ospakizunean. Baita Jose Ayala (hilda), Eduardo Arana, Xabier Elizondo eta Julio Gallastegui zuzendari nagusi ohiak ere (azken bi horiek ez dira ekitaldian izan, Arrasatetik kanpo zeudelako).
Era berean, omenaldia egin zaie urte hauetan guztietan erakundeko Kontseilu Errektoreko kide izan direnei (bi lagun esanguratsuk ordezkatuta): Juan Larrañaga eta Juan Domingo Gaztañaga. Eta omen ekitaldiak ez du ahaztu nahi izan mugimendu kooperatiboaren sortzaile eta sustatzailea, Don Jose Maria Arizmendiarrieta, berak diseinatu baitzuen eredua, gizartea eraldatzeko zeukan ikuspegi handiarekin.
