Aiako Jose Luis Odriozolak jaso du gazta onenaren saria
Euskal Jaiak ospatzen dabiltza Ordizian eta Foru Aldundiko ordezkariak, Markel Olano diputatu nagusia buru dela, gaur, irailak 6, egindako aparteko azokan izan dira. Eguraldiak lagundu ez arren herri giroa berotuaz joan da poliki-poliki, eta aurten ere bertan ekoiztutako fruituak, barazkiak eta abereak izan dira protagonista nagusiak; erosleek izan dute zer eta non aukeratua. Handik eta hemendik baserritar asko gerturatu da azokaren bueltan antolatutako lehiaketetara; hala nola, fruitu eta barazki-lehiaketara eta Gipuzkoako piriniar arrazako behi lehiaketara. Aldi berean, hainbat erakusketa izan da, besteak beste: perretxikoena, euskal oiloarena eta nekazaritza tresneria eta makinariarena. Eta Plaza Nagusian astero postua jartzen duten baserritarrei Aipamen Berezia egin diete.
Gazta onenaren saria Aiako Jose Luis Odriozolarentzat
Gazta lehiaketa entzutetsuak jakin-min handia sortu du beste behin. Ardi latxa gazta lehiaketaren 44. ekitaldia jokatu da aurten eta gazta onenaren saria Aiako Jose Luis Odriozolarentzat izan da. Juan Mari Arzak lehendakari izan duen epaimahaiko kideek 8,1eko balorazioa eman diote horri, eta saria, diputatu nagusiaren eskuetatik jaso du, 1.550 euro eta Kutxaren garaikurra. Bigarren saria Elgoibarko Mausitxak jaso du; eta hirugarrena, Zeanuriko Ipiñaburuk. Enkantean 8.200 euro ordaindu ditu Carrefourrek gazta erdiaren truke.
