Zizurkilgo lubakiak berreskuratzeko lanean dihardute hemezortzi gaztek
Zizurkil, Asteasu, Aduna eta Larraulgo Udalek eta Aranzadi Zientzia Elkarteak antolatutako auzolandegiak abian dira uztailaren 3az geroztik, Foru Aldundiaren laguntzarekin. Hemezortzi gazte ari dira indusketak egiten Zarateaitz inguruko lubakietan. Gazte horien formazioa sustatzea da hain zuzen ere auzolandegien helburu nagusia.
Altxamendu militar frankistaren aurkako erresistentziaren mugarri izan zen auzolandegien gunea. Aduna, Asteasu eta Zizurkilen eraikitako lubakien berri ematen duen dokumentazioa aurkitu dute, eta berreskuratze lanetan dihardute orain. Obus zatia, bala zorroak eta bala bat aurkitu dituzte oraingoz. Lanak uztailaren 16a arte iraungo dute auzolandegian.
Gipuzkoako Foru Aldundiko Bizikidetza eta Giza Eskubideetako zuzendari Maribel Vaqueroren esanetan Aldundiaren helburuen artean dago memoriaren pasarteak ezagutaraztea: "Zer gertatu zen jakitea eta transmisio edo dibulgazioa egitea, gure historiaren parte oso inportantea delako. Gazteek egindako auzolandegi hauek lagundu egiten dute transmisio horretan".
Lau herrietako Udal ordezkariek eskerrak eman dizkiote Aldundiari, eta Maite Amenabarrek, Zizurkilgo zinegotziak gazteen lana goraipatu du: "Auzolandegiko gazteak izan dira egia aurkitzeko xedean gure begiak eta eskuak".
