Azken egunak B-tuber ikastaroan izen emateko!
Bilboko Udalak eta Azkue Fundazioak elkarlanean B-Tuber egitasmoa jarri dute abian Bilbon erroldatutako 14-17 urte bitarteko gazteei bideoak euskaraz sortzera eta editatzera animatzeko asmoz. Horretarako abenduaren 26tik urtarrilaren 5era bitartean, Euskararen Etxean 12na orduko hiru ikastaro (ikastaro bakoitza hiru egunetan egingo da) eskainiko dira.
YouTuben euskararen erabilera zabaltzeko asmoarekin sortu da B-Tuber; izan ere, Youtube da gazteek euren aisian ikus-entzunezko edukiak ikusteko, partekatzeko eta trukatzeko gehien erabiltzen duten kanaletako bat. Aldi berean, ekimenean parte hartzen dutenek aukera izango dute YouTuben bideoak sortzeko, editatzeko, produzitzeko eta post-produzitzeko eta kanalak sortzeko eta gestionatzeko ezaguera teknikoak eskuratzeko.
Ikastaroetan gai interesgarriak landuko dira benetako “youtuber” bihurtu nahi dutenentzat, esaterako: Youtuben kontu bat sortzeko urratsak; izena ematea youtubeko kanaletan, profila pertsonalizatzea, “videopad” programarekin grabaketak eta muntaiak egitea, musika jaistea eta post-produziorako beste pertsona batzuen irudiak erabiltzea, bisualizazio gehiago izateko estrategiak…
Ikastaroak abenduko eta urtarrileko egun hauetan egingo dira, 10:00etatik 14:00etara bitartean, Euskararen Etxean:
- Abenduaren 26an, 27an eta 28an [plazak agortuta]
- Abenduaren 29an eta 30ean eta urtarrilaren 2an
- Urtarrilaren 3an, 4an eta 5ean
B-Tuber tailerretan izena emateko azken eguna, abenduaren 17an izango da. B-Tuber ekimenean parte hartu nahi dutenek Gabonetako oporraldiaren barruan ikastaroa noiz egin nahi duten adierazi beharko dute formulario batean.
Ikastaroak euskara hutsean emango dira eta irakasleak EHUko Informazio eta Komunikazio Zientzien fakultateko graduko ikasleak izango dira.
