EiTBk eta Eusko Jaurlaritzako Kultura eta Hizkuntza Politika Sailak elkarlanean sortu dute 'Bihotzetik ezpainetara' kanpaina. Euskara erabiltzera gonbidatzea da kanpainaren asmoa, batez ere gazteentzat. Hauek erakartzeko Go!azen telesail arrakastatsuarekin egin du bat kanpainak.
Iaz Euskararen txantxangorria abestiak lortutako arrakastaren ildotik, aurten Iker Laurobaren Gure nahia abestia bilakatu dute bideoklip. Protagonistak Go!azen telesaileko neska-mutikoak dira, aurreko denboraldikoak eta lau gazte berri. Ekainaren 15ean, Bilbon egin zen kanpainaren aurkezpena, 250 haurren haurrean. Bide batez telesailaren hirugarren denboraldiko berrikuntzei buruz hitz egin zuten, izan ere, denboraldi berria grabatzen hasi berri daude. Aurkezpenean Miren Dobaran Eusko Jaurlaritzako Hizkuntza Politikako sailburuordea egon zen, eta berarekin batera, Edu Barinaga ETBko zuzendariak eta Xabi Zabaleta Pausokako Proiektuen zuzendariak hartu zuten parte. Hauekin batera, nola ez, Go!azen-eko aktore nagusiak egon ziren: Markel Gajate, Miren Arrieta, Aritz Mendiola, Ainhoa Larrañaga, Asier Burguete, Oihan Moreno, Nerea Mazo, Sara Nieto, Beñat Iturbe eta Iholdi Beristain.
Gazteei zuzendutako kanpaina
Aurten ere, iaz bezala, euskara erabiltzea gonbidatzea da Go!azen-en asmoa, bideokliparen bidez. Eusko Jaurlaritzaren kanpainak, berebat, beste euskal komunikabideetan ere izango du isla. Miren Dobaran Hizkuntza Politikarako sailburuordeak kanpainaren aurkezpenean adierazi zuen gazteak direla "euskara gehien dakitenak", eta eurak direla baita ere "gure hizkuntza gehien erabiltzen dutenak". Hizkuntza Politikarako sailburuordeak azaldu zuenez "aisialdian aukerak ematea edota Go!azen bezalako produktuen erakarmena baliatzea oso bide interesgarriak dira".
Edu Barinaga, ETBko zuzendariaren ustetan Go!azen "gazteentzako euskarazko produktu borobila" da. Hartara, "euskara zabaltzeko aktore gazte talde hauen ahaleginak indar asko duela sinetsita" dago ETBko zuzendaria. Bideokliparekin kurtso berriarekin etorriko den "Go!azen zurrunbilorako giroa berotu" nahi dutela azaldu zuen Barinagak.
Kanpainaren inguruko informazioa ondoko webgunean kontsulta daiteke: http://bihotzetikezpainetara.eus/
