Euskal Wikilarien Kultur Elkarteak eta Azkue Fundazioaren arteko lankidetza-hitzarmena
Bi erakundeek lankidetza hitzarmena sinatu dute euskarazko Wikipedia bultzatzeko, euskarazko softwarea bultzatzeko eta eduki eta jakintza libreak bultzatzeko. Euskararen Etxean egin den hitzarmenaren sinadura ekitaldian Xabier Armendariz, Euskal Wikilarien Kultura Elkartearen presidenteak eta Jurdana Acasuso, Azkue Fundazioko zuzendariak parte hartu dute.
Atzo goizean, irailaren 7an, sinatu zen bi erakundeen arteko lankidetza hitzarmena. Euskal Wikilarien Kultur Elkarteak (EWKE) euskarazko Wikipedia bultzatzea helburu izanik, eta Azkue Fundazioaren helburua euskararen erabilera era aktibo eta zabalean sustatzea izanik, lankidetzan aritzea erabaki dute biek beraien helburuak lortzeko. Ildo horretan, euskarazko Wikipedia tresna ezin hobea izan daiteke bi erakundeen arteko elkarlana sustatzeko, elkarte bakoitzak berez egiten duenaz gain. Elkarlan honek hiru ardatz ditu eta 2017-2018 ikasturtean zehar hedatuko da.
Euskarazko Wikipedia eta softwarea bultzatzea
Lehen ardatza, euskarazko Wikipedia bultzatzea da, hitzaldiak emanez eta Bizkaian Herripediak sustatuz. Euskarazko Wikipedia ezagutarazteko hitzaldi ziklo bat egingo da 2017ko udazkenetik abiatuta, Bizkaiko eskualde bakoitzean bana. Helburua proiektuaren inguruan hitz egitea izango litzateke, herri bakoitzan egin daitezkeen gauzen inguruko argibideak emanez eta, bukatzerakoan, editatoi txiki batekin. Gainera, Iurretapedia, Donostiapedia edo Amarapediaren ereduak jarraituz, Bizkaiko lau herritan “Herripediak” egiteko konpromisoa hartzen du Azkue Fundazioak. Proiektu honetarako hautatzen diren lau herrietan elkarte, idazle, irakasle eta liburutegietako langileekin lana egingo da, materiala bildu eta, guztien artean, herriko edukiak Wikimedia proiektuetan hobetzeko.
Bigarren ardatza, euskarazko softwarea bultzatzea da ekintza desberdinen bidez. Alde batetik, Translatewiki erabilita MediaWiki itzultzeko lana Azkue Fundazioak proposatutako itzultzaile batek egingo du, euskarazko milaka Wiki plataformen (ez soilik Euskarazko Wikipedia, baita eskoletan erabiltzen diren wikiak, Wikia, edo Wikispaces ere) itzulpena eginez. Gainera, TranslateWikiren bidez ez da bakarrik MediaWikiren softwarea itzultzen. Bertan itzultzen dira OpenStreetMap bezalako tresnak. Software hori itzultzeak euskarazko komunitateari onurak dakarzkio, eta akordio honen baitan ere jaso da. Bestetik, Wikimedia Fundazioak abiatu duen 2030 Estrategiaren baitan eduki askok itzulpena behar dute eta EWKEren baliabide gabeziaren aurrean, Azkue Fundazioak itzulpen zerbitzua eskainiko dio EWKEri, WMFren eztabaidaren mezuak itzultzeko. Honetaz gain, Azkue Fundazioak eta EWKEk itzul-a-thon bat antolatuko dute, Bilboko Euskararen Etxean, itzulpen lanen inguruan hitz egin eta marko teorikoaz gain itzulpen masiboak egiteko.
Eduki eta jakintza libreak bultzatzea
Azkenik, hirugarren ardatza eduki eta jakintza libreak bultzatzea da. Ardatz honen barnean, Azkue Fundazioak EWKErekin batera Bizkaiko Foru Aldundiaren barruan materialak askatzeko konzientziazioa landuko du eta EWKEk Wikisourcen aditua den pertsona baten hitzaldia eskainiko die Bizkaiko Foru Aldundiko Ondare zerbitzuko arduradun eta langileei, egoeraren berri emateko. Bestalde, Durangoko Azokan azken urteotan K@abia ekimenaren baitan Euskarazko Wikipedia eta Wikimediako beste proiektu batzuen inguruko lanketa egin da eta aurten pauso berriak eman nahi dira, photocall bat sortuz euskal kulturako pertsonalitateen argazkia igo ahal izateko.
Euskal Wikilarien Kultura Elkartea, Wikimedia Fundazioaren elkartutako erakundetzat onartuta dago eta euskal hizkuntza, euskal kultura eta jakintza unibertsala ditu ardatz. Elkartearen helburuak lau dira: kultura eta jakintza unibertsala euskaldunen eskura jartzea, formatu askean dauden entziklopedien, liburuen, hiztegien eta bestelako agirien bidez; euskarazko Wikipedia eta gainerako Wikimedia proiektuak sustatzea, ezagutaraztea eta zabaltzea; euskararen normalizazioari laguntzea; eta Wikimediaren helburuekin bat eginez, auzolana eta jakintza askea sustatzea.
Azkue Fundazioaren helburuak berriz, euskararen erabilera era aktibo eta zabalean sustatzea, euskal hizkuntzaren normalizazioari positiboki eragitea, eta agerian uztea euskara komunikaziorako tresna moderno eta garaikidea dela; euskarari eta euskararen transmisioari laguntzea da. Gainera, euskal komunitatea indartzea ere du helburutzat, euskara presente dagoen baliabide eta eremuen kopurua handitu dadin, besteak beste, euskara gaur egungo ingurune digitalean integratuz.
