Komiki digitalen lehiaketaren 5. edizioko sariak gaur, Azkue Fundazioaren eskutik
Azkue Fundazioak Komiki digitalen lehiaketaren 5. edizioko sari banaketa ekitaldia ospatu du gaur Euskararen Etxean. Ikasturte osoan zehar Euskararen Interpretazio Zentroa bisitatzera etortzen diren ikastetxeetako taldeen arteko lehiaketa da.
Bosgarren edizioan, 2016-17 ikasturtean zehar, 3.886 ikaslek hartu dute parte, 60 ikastetxe ezberdinekoak. Lehiaketan ikasleek euskara eta teknologia lotzen dituzten gai bat landu eta horien edukiekin komiki digital bat sortu izan dute. Guztira ia 1700 lan ezberdinekin parte hartu dute ikasleek edizio honetan.
Komiki digitalen tailer eta lehiaketa hau, Euskararen Etxera bisitan datozen ikastetxeetako taldeekin jarduera osagarri moduan eskaintzen da. Ikasle taldeek Euskararen Interpretazio Zentroa bisitatu eta ondoren tailer praktikoa burutzen dute, beti euskara eta teknologia uztartzen dituena.
Tailer hauetan Lehen Hezkuntzako 5. maila eta Batxilergoaren arteko ikasle taldeek parte hartu dute. Lehiaketa 2 kategorietan banatuta egon da:
- 1go kategoriako taldeek, LH 5 eta 6.mailakoek eta DBHko 1go eta 2. mailakoek gai hauek landu dituzte: Euskarak badu lekua interneten; Pribatutasuna sare sozialetan; eta Smartphonen erabilera.
- 2. kategoriako taldeek, DBH 3. eta 4. maila eta Batxilergoko 1go eta 2. mailako taldeek, beste gai hauek landu dituzte: Pribatutasuna sare sozialetan; Creative Commons eta edukien partekatzea; eta Sexting-a.
Talde bakoitzak hauetako gai bat landu du, begirale baten laguntzaz eduki orokorrak aztertuz; eta ondoren, sormenari eutsiz, aurretik proposatutako komiki digital baten bunbuiloak osatu behar izan dituzte bikoteka edo hiruka.
Edizio honetan 171 lantegi burutu dira, 60 ikastetxeetatik etorritako 3.886 ikaslek hartu dute parte. Beraz, edizio arrakastatsua izan dela adierazi dute Azkue Fundazioko ordezkariek, bai parte hartze aldetik eta bai ikasleei zabaldutako baliabide berrien aldetik. Sarea, pribatutasuna, edukien partekatzea eta euskara ingurune digitalean erabili ahal izateko aukera berriak ezagutu dituzte jarduera hauen bidez.
Ekitaldia eta irabazleak
Guztira 12 lan saritu dira eta 27 irabazle daude: lehenengo eta bigarren kategorian "internetek euskaraz aritzeko ematen dituen aukerak" eta "sare sozialetan zaindu beharreko pribatutasun neurriak" gaiekin lotutako lehenengo, bigarren eta hirugarren sari bat eta "Creative Commons" delakoaren eta "ezagutzasarean partekatzeari" buruzko gaian bigarren kategoriako hiru sari.
Sarituak:
1.KATEGORIA
2.KATEGORIA
Bizkaiko eta Gipuzkoako ikastetxeetako ikasleak izan dira sarituak aurten, bi herrialdeen artean pareko suertatu direlarik. Lehenengo kategorian Bizkaiko ikastetxeak nabarmendu badira ere, bigarrenari dagoionean, ostera, Gipuzkoako ikastetxeetako parte hartzaileak nagusitu dira.
Sariak:
Irabazle bakoitzak komiki sorta bat eta produktu teknologikoren bat jaso du. Sarien artean; dronak, altaboza eramangarriak, argazki kamerak eta GoPro kamarak jaso dituzte irabazleek.
Gainera, gazteek beraien lanak online plataforma batean ikusteko aukera izango dute.
Yerai Veróniz eta Irati Urdangarin Ollo izan dira bosgarren edizioaren epaimahikideak.
Ekitaldia Euskararen Etxean ospatu da, goizeko 11etatik aurrera, eta sarien banaketa Azkue Fundazioaren zuzendaria den Iurdana Acasusok egin du.
Aurkezpen lanetan eta giroa alaitzen Tor magoaren presentziaz gozatu ahal izan dute parte hartzaile eta ikusleek. Irabazleak aurkezteaz gain magia ikuskizuna eskaini du baita ere.
