Kultura eta Hizkuntza Politika Sailak "Mingaina dantzan" udalekuak aurkeztu ditu.
Euskara jakite ezberdinetako gazteak batuko dira jarduera honetan eta euskararen erabilera indartzeko erabili diran tresnen efikazia ere ikertuko da.
Eusko Jaurlaritzako Kultura eta Hizkuntza Politika Sailak “Mingaina dantzan” egitasmoa plazaratu du gaur Donostiako Miramar Jauregian. Honi esker, euskararen erabilera bultzatzeko erabilgarriak diran tresnak ikertzeaz gain, euskarari ezkondutako udaleku erakargarriak bultzatuko dira. Udaleku hauetan, euskara jakite maila ezbardinetako gazteak bilduko dira. Proiektua berria izan arren, bertatik jasotako ondorioak, erabilera bultzatzeko estrategia eta jardunaldiak egiteko erabiliko dira.
Eusko Jaurlaritzarekin batera, EUDEL eta UEMA ere proiektu honen barne aurkitzen ditugu. Egindako prentsaurrekoan Miren Dobaran (Hizkuntza Politikako sailburuordea), Aitor Aldasoro (Beasaingo alkate eta EUDELEko euskara ordezkaria), Josu Labaka (UEMAko presidentea), Iñaki Eizmendi (Ebete enpresako hezitzailea) eta Iñaki Aristondo (Ttakun enpresako ordezkaria) egon dira. Udalekuetan zehar ere EiTb-ko Goazen! Telesailaren protagonistak agertuko dira eta proiektuaren gaurko aurkezpenean Inma Fernandez, Haritz Morras eta Lorea Iribar izango dira.
Udalekuetan parte hartuko duten gazteak EAE-ko zenbati eskualdetatik joango dira. Urola Kosta-Urola Erdia, Oarsoaldea, Lea Artibai,…besteak beste. Hori dala eta, batuko diran gazteek errealitate ezberdina dute euskararekiko. Udaleku hauek bi txanda ezberdinetan antolatuko dira. Lehenengoa, Mundakako aterpetxean izango da, uztailaren 3tik 12ra arte. Bigarrena, ostera, Kortezubiko Baratze aterpetxean izango da, uztailaren 21etik 30era arte. 30 lagunek parte hartuko dute txanda bakoitzeko eta Azpeitia, zumaia, Barakaldo, Oiartzun, Markina-Xemein eta Gasteizko ikastetxeetatik etorriko dira, hurrenez hurren.
Miren Dobaran Hizkuntza Politikako Sailburuordeak argitu duenez, udaleku interesgarriak diseinatu eta esperientzian oinarrituko da erabilera sustatzeko erreminten balioa ikertzeko: “Azken hamarkadotan ikusi dugu euskararen ezagutza asko igo dela eta erabilera ere era nabarmenean hazi dela. Hala ere, erabilera eta ezagutza ez dira neurri berean hazi, eta erabileraren bilakaera hori ezberdina izan da lekuen arabera. Euskal hiztunen ezaugarriak zeharo aldatu dira eta erabileran eragiteko lehen balio zuenak gaur ez du balio. Erabileran aurrerapausoak emateko ahalmena egon daitekeela uste dugu, batez ere gazteen artean, haien ezagutza altua baita. Dena den, erabileran eragin dezaketen politikak diseinatzeko orduan asmatu egin behar dugu. ‘Mingaina dantzan’ proiektua oso eraginkorra izan daiteke horretarako”.
Sailburuordeak nabarmendu duenez eremu soziolinguistikoa erabileran erasan gehien duen faktoreetako bat da. Ekimen honi esker, errealitate ezberdinetan bizi diren gazte taldeak elkarregaz biziko dute ikerketarako erabiliko diren udalekuetan: “Badaude euskaraz bizitzeko errazagoak diren eremuak, eta beste batzuetan, berriz, erabilera sustatzea zailagoa izaten da. Udalerri zehatz batzuk aukeratu ditugu, baina beste asko izan zitezkeen aukeratuak, bai euskararen presentzia nabarmena dutelako bai horietan erabilera apalagoa delako. Euskararekin harreman ezberdina duten gazteak izango dira udalekuetan, eta testuinguru honetan euskara sustatzeko metodologien eraginkortasuna neurtuko da”.
Aisialdirako proiektu berri honen balioa nabarmendu du EUDEL-eko ordezkariak eta ondorioen hedapena sustatzeko konpromezua argitu du. UEMA-ko ordezkariak, ostera, eremu soziolinguitiko ezberdinetan ibili da eta proiektu honen emaitzak kontutan hartuko dituela adierazi du.
Euskararen erabilera bultzatzeko baliabide eta erremintak kudeatzen dituen EBETE enpresak kudeatuko du ikerketa. Iñaki Eizmendi hezitzaileak ikerketaren zehaztasunak argitu ditu: “Euskararen erabilera sustatzeko tresna ezberdinak daude; proiektu honetan horietako batzuen eraginkortasuna aztertuko da eta, horrez gain, beste baliabide batzuk lehenengoz garatuko dira. Ateratako ondorioak oso interesgarriak izan daitezke erabileran nola eragin aztertze aldera”. Iñakiren hitzetan, erabilitako tresnak hiru maila ezberdinetakoak izango dira: oinarrizko estrategiak, eusleen kontzeptuari ezkondutakoak eta erabileran gehien eragiten duten 12 faktore nagusien ingurukoa.
Udaleku hauen kudeaketan Ttakun Kultur Elkartea izango da arduradun. Iñaki Aristondo elkarteko arduradunak azpimarratu duenez, txanda bakoitzak 10 eguneko iraupena izango du eta 30 gazte inguru bilduko dituzte, 12-14 urte bitartekoak. Jomuga soziolinguistikoak zintzoki erdiesteko, giro euskaldunetako 18 nerabe eta gaztelera nagusi den giroetako 12 nerabe batuko dira txanda bakoitzean. Aristondoren esanetan, aterpetxea Busturialdea bezalako kokapen batean izateak ere garrantzia du. Erabateko udalekuak izango dira eta EtB1eko Goazen! Telesaileko protagonistek ere parte hartuko dute esperientzian.
Ekimen hau aurrera atera ahal izateko, Kultura eta Hizkuntza Politika Sailak 60.000 euro zuzendu ditu.
