Rigoberta Menchu, Bakearen Nobel Sariduna, Foru Aldundiko ordezkariekin elkartu da
Gipuzkoako diputatu nagusiak, Markel Olanok, harrera egin dio gaur Rigoberta Menchu Tumi. Bakearen Nobel Saridun 1992an eta Nazioarteko Kooperazioan Asturiaseko Printzearen Saridun 1998an, Gure Lurra Sembrando Futuro topaketan parte hartuko du bihar, abenduak 5, Donostiako Kursaalen. Foru Aldundiaren egoitzan egindako harrera ofizialean Ekonomia Sustapena, Landa Ingurunea eta Lurralde Orekako diputatu Ainhoa Aizpuru ere izan da.
Lehenengo sektorea bultzatzea helburu
Rigoberta Menchu Tumek (Guatemala, 1959) elkarrizketaren bidez herrien arteko bakea bultzatzen duten egitasmo nazionalak eta nazioartekoak bultzatzea eta lekuko izatea du
helburu. Bere izena daraman fundazioko presidente da eta Bakearen Nobel Saridun Emakumeak Egitasmoaren fundatzaile eta zuzendaritza batzordeko kide ere bai. Goizean,
Josu Oiartzabal artzain eta gaztagilearen baserrian izan da Menchu, Errenterian, lurraldeko baserritarren errealitatea ezagutu asmoz.
Menchurekin egindako bileran zehar, Nobel Saridunarekin partekatu ditu Markel Olanok lehenengo sektorea eta elikagaien sektorea bultzatzeko abiarazitako politikak. Politika horien oinarrian dago baserritar, abeltzain eta artzainek, beren lanari esker, lurraldeko ekonomiari, kulturari, paisaiari eta ongizateari egiten dioten ekarpena.
Gipuzkoako Foru Aldundiaren babesarekin lehen sektoreko eragileak lurraldeko landa ingurunearen etorkizunari buruz egiten ari diren parte-hartze prozesuaren barruan kokatzen da Gure Lurra Sembrando Futuro topaketa. Lehen sektorea ikusarazteko sortu da topaketa hori, sektore horrek Gipuzkoako gizartearen ongizateari eta lurraldearen paisaiari eta natur ingurunea kontserbatzeari egiten dion ezinbesteko ekarpena aitortzeko xedez. Baserritarren eta mundu hiritarraren arteko topaleku izatea ere badu helburu.
Profesionalen testigantzak topaketan
Rigoberta Menchu izango da jardunaldiko hizlari nagusietako bat, Odile Rodriguez de la Fuenterekin batera; azken hori biologoa da eta El hombre y la tierra telebista saioaren lekukotza zabaltzea du helburu. Horrez gain, Gipuzkoako landa eremuko profesionalen testigantzak ere ezagutu ahal izango dira, beren esperientziak partekatuko baitituzte.
Lurrateko Antton Olaizola, Goenaga Esnekiakeko Arantxa Goenaga, Balentin Gabilondo ganadutegiko Balentin Gabilondo, Eguzki Borda baserriko Josu Oiartzabal eta Horticultura Alberroko Xabier Alberro izango dira lehen sektoreko profesional gisa izan duten esperientzia ikus-entzuleei kontatzen.
