'Zer jan, hura izan' bideoa ekoiztu du Altzoko Imaz Bertsolaria eskolak ‘EAThink’ lehiaketari esker
Altzoko Imaz Bertsolaria eskolako ikasleek, EAThink2015 - bertokoa jan, mundua buruan eskolen arteko bideo lehiaketa irabazi dute; horri esker, Zer jan, hura izan bideo profesionala ekoiztu dute. EAThink Euskal Fondoak sustatutako proiektuak, gazteen artean elikadura ereduari buruzko hausnarketa sustatzea bilatzen du; hezkuntza, elikadura eta sormena uztartuz.
Proiektua LHko 5 eta 6. mailako, DBHko eta batxilergoko ikasleei zuzendutako dago eta Europar Batasunaren laguntza jaso du. Ikasgeletan elikadura ohitura jasangarriak eta errespetuzkoak sustatzea bilatzen du; gaur egungo ereduak sortzen dituen ondorioak ezagutaraziz edo alternatiba jasangarriak sustatuz. EAThink proiektua martxan jartzeko, ikastetxeek hainbat material didaktiko jaso zituzten; hauek ikasgeletan landu ostean, hogeita hamar lan aurkeztu ziren otsailean EAThink bideo lehiaketara.
Sariketara aurkeztu ziren lanen artean, proiektuaren helburuak hobekien betetzen zituen bideoa Altzo Osasuntsu izan zen epaimahaikideentzat. Mezua, ideiaren zuzentasuna, ikasleen parte-hartzea, transmititzen den energia eta narrazio ulerterraza funtsezkoak izan ziren azken erabakia hartzeko orduan. Bideo irabazlearen ildo nagusiak kontsumo arduratsua eta elikadurari loturiko hondakinen sorrera dira. Protagonista berriz, kontzientziaz beteriko super-heroi gogotsu bat da.
Hiru sari irabazleentzat
Bideoak lortutako lehen postu horri esker, Altzoko Imaz Bertsolaria eskolako ikasleei hiru sari egokitu zitzaizkien; Sastarrain Baserri Eskolan bi eguneko egonaldia, bideoaren produkzio profesionala eta zabalpena eta Europa mailako lehiaketan parte hartzea.
Sastarraingo esperientziaz gozatu ostean, bideoaren ekoizpen profesionala egin dute, protagonistatzat ikasleak beraiek hartuta. Zer jan, hura izan leloa aukeratu dute ikus-entzunezkoa izenpetzeko. Orain, bideoa Europako beste hainbat herrialdetan irabazi duten beste ikus-entzunezkoekin lehiatuko da. Izan ere, Europako hamabi herrialdetako eta Afrikako bi herrialdetako lehen eta bigarren hezkuntzako ikasleak parte hartu dute EAThink proiektu Europarrak sustatutako lehiaketa eta ekintza ezberdinetan.
