Dokumental interaktibo bat sortzen irakatsiko dute UEUren Eibarko ikastaroetan
Uztailaren 10ean eta 11n izango da ikastaro hori, Klynt programaren erabilpenean oinarrituko dena. Beste hamar ikastaro ere badaude aukeran Eibarren, eta oraindik eman ahal da izena.
Iruñeko ikastaroak eta Baionako gehienak ere pasata daudela, Eibarreko sorta geratzen da, datozen egunetan hasiko dena. Libe Mimenzak zuzenduko du ikastaroa, eta Edorta Arana eta Bea Narbaiza ere ariko dira irakasle; hirurak Kazetaritzan lizentziatuak dira, lehena doktoregai eta beste biak doktore dagoeneko. Partaideek nazioarteko hainbat dokumental interaktibo ikusi, egileen esperientzietatik ikasi eta nabigazio moduak aztertuko dituzte lehenik. Gero, Klynt programaren oinarriak ikasiko dituzte eta euren diseinu propioa praktikara eramateko edizioan murgilduko dira.
Eibarko gainerako ikastaroetan denerik dago: erlezaintza, telebista publikoa, sorkuntza garaikidea... Momentuz 11 ikastaroetako bakarra dago beteta, unitate didaktiko digitalen diseinuarena hain zuzen ere.
