Haurren transexualitatea, euskara edota gazteria, UEUren Iruñeko ikastaroetan
Ekainaren 26tik 28ra bitartean garatuko dira Iruñeko udako ikastaroak, eta astebete lehenagora arte izena eman ahalko dute interesdunek. 7 ikastaro eta 2 hitzaldi eskainiko ditu Udako Euskal Unibertsitateak, ELKAR EKIN lemapean.
Nafarroako Gobernuaren Hezkuntza Departamentuarekin elkarlanean prestatu dituzte hitzaldiak eta ikastaroetako bi ere bai, denak doan. Adibidez, haur transexualitateaz jardungo du Iñaki Goñi irakasle eta sexologoak, 27an. Horren bezperan, bullynga hartuko du gaitzat Gotzon Carcar coach pertsonalak. Bestalde, ahozkotasuna eta Visual Thinking tresna izango dira ikastaroen oinarriak.
Gainerako ikastaroei dagokienez, hurrengo gaiak iragarri dituzte: ETAren V. biltzarra, haurren espazio sorkuntza, euskara eta etorkinak, gazteen parte-hartze politikoa, eta egitatezko bikoteak eta umeen zaintza.
Iruñearekin batera, Baiona eta Eibarren antolatuko dituzte aurtengo ikastaro gehienak. Hala ere, Bilbon, Donostian eta Usurbilen ere egongo dira ekintza batzuk.
