Irati Iciar: “Udako Ikastaroetarako 110 proposamen jasotzea sekulako sorpresa izan da”
UEUk antolatzen dituen Udako Ikastaroen arduraduna da Irati Iciar. Pozik dago, aurten elkarlanerako hainbat ideia jaso dituztelako. UEUren sare aberatsa erakusten duela uste du. Inskripzioa hasita dago.
Aurtengo lema modura Elkar Ekin aukeratu duzue. Zergatik?
Udako ikastaroetan lankidetza edo elkar ekintza oso garrantzitsua da. Gure sailetaz aparte, beste hainbat bidaide ditugu, eta horiei omenalditxoa egin nahi izan diegu. Abenduan ikastaroak egiteko proposamenak bidaltzeko deialdia zabaltzen dugu, eta aurten, ekainera bitartean 110 jaso ditugu. Guretzat sekulako sorpresa izan da; aurreko urteetan ere kopuru handiak izan ditugu, baina ez hainbeste. Pozik gaude, UEUren sarea zeinen aberatsa den erakutsi digulako. Bestetik, erantzukizun handia izan da hautaketa egitea, 30 bat ikastaro ematea zegoelako gure buruan.
Zer helbururekin antolatzen dituzue udako ikastaroak?
Etengabeko prestakuntzaren filosofian integratzen dira. Bizi osoan ikasten gaude, eta uda garaia jardunaldiak egiteko eta profesionalak biltzeko aproposa da. Euskaldunen formazioa da helburua, gure ikastaroak euskara hutsean ematen baitira. Bestalde, sarea egitea ere bai; horregatik proposatzen dugu batera bazkaltzea, kafea hartzea... Elkargune bat dira, eta esperientzietatik ikasteko politak. Horrez aparte, Baionan eta Iruñean ikastaroak egitea ez da kasualitatea, UEU bertan egon behar dela uste baitugu.
45. edizioa da aurtengoa, UEUren ibilbide oparoaren islada.
45 urte udako ikastaroak eskaintzen. Azkar esaten da, ezta? Aurten 110 proposamen jasotzea eta hainbatek gurekin elkarlanean jarraitu nahi izatea oso aberasgarria eta pozgarria da guretzat. Ikastaroak moldagarriak dira eta garaiko beharretara egokitzen joan dira; orain 30 bat urte euskara ikasteko barnetegi formatoa hartzen zuten, adibidez.
Autengo inskripzioa hasita dago, eta ikastaro batzuk betetzen hasi dira.
Bai, talde txikiak hobesten ditugulako gertatzen da hori. Ulertzen dugu talde txikietan konfiantza giroa hobeto sortzen dela, irakaslea bera ere erosoago egoten dela... Ikastaro trinkoak dira eta etekina atera behar zaie. Gure webgunean (ueu.eus) sartu eta bertan topatu ahal da informazio guztia: bekak, laguntzak, deskontuak, harremanetarako bideak...
