"Oso gustura gaude aurtengo udako ikastaroekin"
Amaitu dira UEUren udako ikastaroak, eta Irati Iciar arduradunak balorazioa egin du. Partaidetza handia egon dela nabarmendu du, eta baita elkarlana ere.
600 partaidetik gora eduki dituzte ikastaroetan, eta balorazio positiboa egin du UEUk. Ez bakarrik ikasle kopuruagatik, baita bertan sortutako lankidetzengatik ere. Elkar Ekin izan da aurtengo lema, eta ikastaroak antolatzeko auzolana garrantzitsua izan dela azaldu du Iciarrek; erakunde eta pertsona askoren ekarpena eduki dute. 110 proposamen jaso zituzten ikastaroetarako, eta horietatik 35 aukeratu gero. Gainera, "pertsonen arteko elkarrekintza" landu dela esan du, ikastaroek alde informala ere baitaukate.
Bestalde, udako ikastaroetan "gero eta pisu handiagoa" dute profesionalen jardunaldiek, Iciarren arabera. Aurten hizkuntzalariak eta komunikazio arlokoak egon dira, besteak beste.
