UEUren Udako ikastaroen matrikulazioa martxan dago, 36 jarduera aukeran daudela
ELKAR EKIN lelopean garatuko dira 45. UEUren Udako ikastaroak. Zabaldu dute izena emateko epea, eta www.ueu.eus atarian topatu daitezke horretarako argibideak.
36 ikastaro, tailer edo jardunalditan parte hartzeko aukera dago, honako arloetan banatuta: gizarte zientziak, artea, giza zientziak, ingeniaritza, teknologia, osasun zientziak eta zientziak. Gustu guztietarako eskaintza dago, beraz. Iruñea, Baiona eta Eibar izango dira egoitza nagusiak, baina Bilbo, Donostia eta Usurbilen ere ekintza bana antolatu dute.
Udako ikastaroen bereizgarri bat zera da, pertsona eta erakunde ugarirekin elkarlanean antolatzen dituztela. Aurten ere horretarako topagune direla adierazi nahi izan dute ELKAR EKIN lemarekin.
