Urkide Ikastolako Legokide taldeak irabazi du First Lego League Euskadiko txapelketa
Innobasquek First Lego League bultzatzen du Euskadin, zientzia- eta teknologia-alderdiekiko interesa pizteko, zehar-gaitasunak garatzeko eta funtsezko balioetan prestatzeko. First Lego League 6 eta 16 urte arteko ikasleentzako hezkuntza-programa da eta Euskadiko Finala Gasteizen egin da. Otsailaren 10ean egin da jardunaldia eta Urkide Ikastolako Legokide taldeak eskuratu du lehen postua. Bigarren postuan, Axular Lizeoko Overclock Axular taldea gelditu da; hirugarren, Tecnoclub Elburgoseko Landeberos Gamberros; eta laugarren, Santa María Ikastolako Edurobotic 2003 taldea.
Erronkak baloratzen dituen hiru arloetan -proiektu zientifikoa, errobotaren diseinua eta baloreak- talde onenak izan dira aipatutako laurak. Haiek guztiak martxoan Logroñon izango dan Estatuko txapelketan egongo dira, munduko finalerako postu batengatik lehiatzeko.
Hezkuntzarekiko konpromisoa
Gazteen artean, zientzia- eta teknologia-prestakuntzarekiko interes falta dagoela ikusita, Innobasquek bere gain hartu du ikasleen interesa pizteko erronka karrera teknikoei, mundu digitalari eta balioetan hezteari dagokienez. Testuinguru honetan, Innobasquek First Lego League jarri zuen martxan, hezkuntza-sistemari STEAM (ingelesezko sigla da: Science, Technology, Engineering, Arts and Mathematics) Hezkuntzan laguntzeko eta gizartean beharrezko balioak bultzatzeko: adibidez, inklusioa, lankidetza, aurkikuntza eta jarrera berritzailea.
First Lego Leaguen Innobasquerekin lankidetzan dabiltza enpresak, teknologia-zentroak eta herri-erakundeak, adibidez Euskaltel Konekta Fundazioa, Mondragon Korporazioa, Bilboko Portua, Iberdrola, Eusko Jaurlaritza, Arabako Foru Aldundia, Bizkaiko Foru Aldundia, Azti Tecnalia, Gasteizko Udala eta Bilbao Bizkaia Ur Partzuergoa. Hauei esker, parte hartzen duten neska-mutikoek lehen eskutik ezagutu dute Euskadin dagoen industria- eta enpresa-sarea aurtengo edizioko gaiaren inguruan, URA, baita horri loturiko lanbideak ere.
Euskaltelek eta Euskal Herriko Telekomunikazio Ingeniarien Elkargoak Digital Water eta zibersegurtasuneko proiektuak erakutsi dizkiete. MONDRAGON eta MSI Group-ek ur-tratamendurako instalazio baten funtzionamendua eta ingeniaritzako zenbait proiektu azaldu dizkiete. Azti-Tecnaliak industriako hondakin-urak ez tratatzeak sortzen duen ingurumen-arazoari nola aurre egin erakutsi zien, eta Bilboko Portuak bere instalazioetan uraren zikloa nola ustiatzen duten.
Estatu mailako parte hartze handiena
Innobasquek antolatutako lehiaketak aurten marka guztiak hautsi ditu. Guztira 1.200 partaide egon dira, 37 ikastetxetako 81 taldetan banatuta. Estatuko lehiaketa handiena da, eta datua benetan nabarmena da kontuan izanik, biztanleriari dagokionez ez dela lurralde handienetakoa. Scientia Fundazioak First Lego League bultzatzen du Estatuan, Lego Education Robotixen, Princesa de Girona Fundazioaren eta Aquarberen kolaborazio estrategikoarekin, azken hau edizio honen erronkako kolaboratzaile tematiko bezala, HydroDynamics-en.
Lehiaketa
Lehiaketan bi kategoria daude: First Lego League, 10 eta 16 urte arteko ikasleak lehiatzeko -52 talde lehiatzen dira-; eta First Lego League Junior, zientzia eta teknologiaren mundura gaztetxoenak, 6 eta 9 urte artekoak, erakartzeko -29 talde-. Gainera, bada aurretiko fase bat ikastetxeetan egiten dena: mikro First Lego League.
Guztiek hartu dute parte Euskadiko Finalean, eta hor OpenGUNE bat ere izan da drone eta auto elektrikoekin jarduerak egiteko, baita matematika-lehiaketa ere. Urtero, parte-hartzaileek erronka tematiko bat gainditu behar dute, antolatzaileek nazioarte-mailan proposatua, hau da, munduan parte hartu nahi duen edozein gazterentzat berbera. Aurtengo edizioan, HydroDynamics erronkari egin diote aurre.
Uraren giza zikloari buruzko guztia ezagutu dute: non eta nola aurkitu, garraiatu eta erabili zuzen eta egoki. Horretarako, parte-hartzaileek taldeak osatu dituzte eta erronka hiru eremutatik landu dute: zientzia-proiektua, robotaren jokoa eta First Lego League balioak. Erronkaren hiru aldeak hobekien garatu dituzten taldeak hurrengo faserako sailkatu dira, Espainiako First Lego League finalerako.
Aurten Innobasquek Gasteizen antolatu du Euskadiko Finala. Euskal hiriburuak lehenengo aldiz hartu du hitzordua, eta Europa Jauregian izan da. Ekitaldian 200 boluntariotik gora hartu dute parte; epaileak, arbitroak, denbora-erregulatzaileak, taldeen laguntzaileak eta abar.
