Nafarroako zirkuituak 'Renault Passion Experience' hartuko du
Asteburu honetan, uztailaren 1ean eta 2an, gidatzeko zaletasuna praktikatzeko aukera egongo da Los Arcoseko zirkuituan, Renault etxeko modelo berrien erakusketaz gainera. Familientzako plan erakargarria izango dela azaldu dute antolatzaileek, ludikoa eta doakoa izango baita.
Hiru espaziotan banatuko da jaialdia. Renault Drive Experiencen, testak egin ahalko dituzte zaleek, eta Renault Sports Exeperiencen piloto profesionalez lagundutako itzuliak emango dituzte zirkuituan. Parte hartu nahi dutenek, webgunean eman ahal dute izena, gero ilararik egin behar ez izateko.
Renault Family Experiencen, bestalde, umeentzako puzgarriak, simulatzaileak eta tailerrak egokituko dituzte, eta haurtzaindegi zerbitzua ere eskuragarri egongo da.
Clio Cup
Jarraitzaileek lasterketak ikusteko parada ere edukiko dute asteburuan zehar. Izan ere, Clio Cup Spain txapelketa bertan jokatuko da, eta hau ere doakoa izango da. Bestalde, tokiko produktu gastronomikoen dastaketa eskainiko dute, eta Renault markako azken nobedadeak erostea posible izango da Boutique Renault espazioan.
