18. Udagoieneko Ostera martxan da!
Bizkaiko Kultur zirkuituaren XVIII.edizioa antolatu du Euskaltzaleen Topaguneak, Bizkaiko Foru Aldundiaren laguntzarekin eta gaur izan da, hain zuzen, XVIII. kultur zirkuituaren aurkezpena, Bilbon. Bertan izan dira Euskaltzaleen Topaguneko zuzendaria, Jasone Mendizabal; Bizkaiko Foru Aldundiko euskara eta kultura diputatu, Lorea Bilbao eta Ana de Castro, Aldundiko euskara sustapenerako zuzendaria.
Aurtengo zirkuituan, puntako musika eta antzerki lanak izango dira protagonista, erreferentzia diren euskal musikarien zuzenekoekin eta istorioak modu originalean kontatzen dituen antzerki berritzaileekin urriaren 21ean hasi eta abenduaren 2ra arte.
Udagoieneko Ostera kultura maite duten euskaltzaleak sorgintzeko moduko kartel batekin dator: Anari, Larregi eta “Hesian” taldeko Fran eta Zuriñeren akustikoa, Kepa Junkera eta Sorginaken “Maletak” ikuskizuna, Su Ta Gar taldearen zuzenekoa, Ez dok Hiru eta Miss Karaoke
Musikaren eta antzerkiaren bueltan gozaraztea da Udagoieneko Osteraren helburua. Euskaltzaleen arteko harremanak artez, sormenez eta gozamenez, gertutik goxatzea.
Hona hemen aurtengo programazioa:
Urriak 21, larunbata. Berrizko Kultur Etxean, 20:00etan. Sarrera 8€.
ANARIren “Epilogoa”
Azaroak 10, ostirala. Igorreko Lasarte aretoan, 21:00etan.Sarrera: 8€
LARREGI taldea eta ZURIÑE&FRAN “Hesian” Kontzertu akustikoa
Azaroak 19, igandea. Bilboko BBK aretoan, 20:00etan. Sarrera: 12€
KEPA JUNKERA eta SORGINAKen “MALETAK” ikuskizunean bat egiten dute antzinako ohiturek, munduko doinuetan inspiratuta sorturiko kantek eta publikoaren indarrak. Ikus-entzunezko esperientzia honetan, Kepa Junkerak lagun dauka oholtzan Sorginak, dantzari, kantari eta perkusiojole diren emakume gaztez osatutako taldea.
Azaroak 23, osteguna. Bilboko Kafe Antzokian, 22:00etan. Sarrera: 12€/15€
SU TA GAR zuzenean. Maitasunari Pasioa antzokietako bira ahaztezinaren ondoren Su Ta Gar ohizko emanaldietara bueltatu da. Taldea sortu zeneko 30 urte betetzen dira aurtengo udazkenean eta indarrez gainezka jarraitzen du, agian ibilbideko unerik goxoenean.
Azaroak 24, ostirala. Arrigorriagako Lonbo aretoan, 20:00etan. Sarrera: 9€
EZ DOK HIRU taldea eszenatokietara itzuli da, Euskal Herriko imajinario musikalaren errepaso ironiko, absurdu eta dibertigarria eskaintzeko. Publiko helduari zuzendutakoa, umorezkoa, euskaraz. Patxo Telleriak testuak sortzeko eta Mikel Martinezek, eta Telleriak berak, zuzenean antzezteko duten estilo paregabearekin. Oraingo honetan, bikoteak beste hiru musikari-aktorekin partekatuko du taula, hitzari, bere ohiko tresna eszenikoari, zuzeneko musikaren indarra gehiturik.
Abenduak 2, larunbata. Leioako Kultur Leioan, 20:30etan. Sarrera: 12€
“Miss Karaoke” antzezlana METROKOADROKA kolektiboa eta PEZ LIMBO konpainiak elkarrekin sortutako lana da.
………………………………………………………………………………………………………………………………………………………….
Sarrerak Interneten, BBKren kutxazainetan eta aretoetan bertan erosi daitezke. Su Ta Garren kontzerturako, Kafe Antzokiaren webgunean edo Ticketea atarian ere eskuratu daitezke.
