Baditugu Banden Lehiako 9. edizioko lau finalistak!
Akabu, Aneguria, Azken Trena eta Raust! izan dira aurtongo finalistak!
Azkue Fundazioak antolatzen duen "Banden Lehia", euskal musika sustatzen duen lehiaketako, 2017ko bederartzigarren edizioan 15 taldek eman dute izena. Lehiaketa honek banda amateurrik onena saritzen du, tokiko taldeak ezagutzera emanez eta, bide batez, euskal musika sarean ere zabalduz.
Irailaren 22a eta urriaren 22a bitartean, euskaraz musika sortzen duten taldeek, www.bandenlehia.eus webgunean izena eman eta internet bidez botoak jasotzeko aukera izan dute.
Estilo anitzetako banda eta kantuak izan dira lehian baina "rock" taldeak gailendu dira batik bat. Hala eta guztiz, pop, metal eta punk alternatiboa ere entzun daitezke.
Euskal Herriko txoko ezberdinetako taldeek hartu dute parte lehiaketan eta nahiz eta gehienak Bizkaia eta Gipuzkoako musikariak izan diren, Nafarroako talde bat ere badago aurten, Berakoa, hain zuzen ere.
Epaimahaia Ritxi Aizpuru (musika editore eta Baga Biga diskoetxeko arduraduna), Xabi Hoo (Enkore taldeko abeslaria), Maia Muruaga (Euskal Irratiko kazetari eta esataria) eta Aritz Gonzalezek (Last Tour International) osatzen dute.
Epaimahaiak, Aneguria, Azken Trena eta Raust! taldeak hautatu ditu finalista moduan baina eurek esandakoaren arabera, aurtengo maila oso altua izan da, kalitate handiko proposamenekin.
Hiru finalista horiez gain, publikoak ere izan du bozkatzeko eta iritzia emateko aukera. Publikoaren iritziz, Galdakaoko Akabu taldea izan da laugarren finalista moduan sartzea gehien merezi izan duena, Banden Lehiako web orrialdearen bitartez egindako bozkaketan 10.612 boto lortuz.
Azaroaren 24an Bilborocken ospatuko den finalean, talde finalistek publikoaren laguntza eta botoak behar izango dituzte berriro ere, baina epaimahaikideak ere bertan izango dira kontzertuak ikusten eta irabazlea zein izango den erabakitzen.
Nahi duen edonor joan ahalko da finalera eta Banden Lehiako finalistez gain, Itziarren Semeak taldearen kontzertuaz gozatu ahal izango du bertara hurbiltzen denak.
