Bisita gidatuak egingo dira asteburuan Plastination aretoan
Plastination, Eureka! Zientzia Museoko erakusketa iraunkorrean dagoen areto berezi bat da. Gizaki eta animalien benetazko piezak daude bertan, batzuk plastinazioaren teknikarekin kontserbatuak, eta gainerakoak, hezurrak direnak, soilik garbituta daude. Erakusketaren helburua da giza gorputza hobeto ezagutu eta animalienekin konparatzea. Gorputzaren hainbat zati ikusi ahal izango dira aretoan, giza gorputzarenak zein beste animalia batzuenak. Barrutik nolakoak garen jakitea eta besteekin alderatzea da helburua.
Gizakiaren gorputz-enborra da erakusketaren pieza nagusia, gure larruazalaren azpian gordetzen den edertasuna eta konplexutasuna erakusten duen elementua baita. Erakusketa honetan orain arte inoiz lortu ez den bezala erakusten da.
Asteburu honetan, urriaren 7an eta 8an, bisita gidatuak eskainiko dira, lehenengoa euskaraz, 13:00etan, eta gazteleraz 13:30ean. Bisita gidatuen iraupena 30 minututakoa da, eta museoko sarrera edukitzea ezinbestekoa izango da.
